కరీంనగర్ : ఈ వానకాలం పంటలకు ఇవ్వాల్సిన రైతుబంధును(Rythu bandhu) ఎగ్గొట్టి ఆ నిధులతో రుణమాఫీ( Loan waiver) చేసిందని ప్రభుత్వంపై రాష్ట్ర మాజీ మంత్రి కొప్పుల ఈశ్వర్( Koppula Eshwar) ధ్వజమెత్తారు. రూ. లక్ష రుణమాఫీలోనూ కోతలు పెట్టి రూ. 2లక్షలు అంటూ అబద్ధాలు చెబుతున్నదని విమర్శించారు. రైతుభరోసా కింద రైతులకు, కౌలు రైతులకు రూ.15 వేలు, రైతు కూలీలకు రూ.12 వేలు ఇస్తామని చెప్పి ఎందుకు ఇవ్వలేని ప్రశ్నించారు. రైతు భరోసా సొమ్మే రూ.20 వేల కోట్లకు పైగా ఉంటుందన్నారు.
రాష్ట్రవ్యాప్తంగా 40 లక్షల పైచిలుకు రైతులు రూ.లక్ష వరకు రుణాలు తీసుకుంటే కేవలం 11 లక్షల మందినే రుణమాఫీకి ఎంపికచేయడం ఎంతవరకు సమంజసమని నిలదీశారు. శుక్రవారం ఆయన ఒక ప్రకటన విడుదల చేశారు. 2014, 2018లో కేసీఆర్ ప్రభుత్వం చేసిన రుణమాఫీతో పోలిస్తే పావు వంతు రైతులకే ఈ ప్రభుత్వం లబ్ధి చేకూర్చిందన్నారు. 2014లో కేసీఆర్ రూ. లక్షలోపు రుణాలు తీసుకున్న 35 లక్షల మందికి రూ.16,144 కోట్లు వెచ్చించారని, 2018లో అదే లక్షలోపు రుణమాఫీకి రూ.19,198 కోట్లు అంచనా కాగా మొత్తం లబ్ధిదారుల సంఖ్య సుమారు 37 లక్షలని వెల్లడించారు. మరి ఇప్పుడు రూ. లక్ష రుణాలు తీసుకున్న రైతులు కేవలం 11లక్షల మంది మాత్రమే ఉన్నారని చెప్పడం శుద్ధ అబద్ధమన్నారు.
ఈ తప్పుడు గణంకాలే ప్రభుత్వతీరుకు అద్ధంపడుతున్నాయని దుయ్యబట్టారు. పాస్బుక్ను పక్కనబెట్టి రేషన్ కార్డును ప్రామాణికంగా తీసుకొని లబ్ధిదారుల సంఖ్యను కుదించారని ఆక్షేపించారు. ప్రభుత్వానికి చిత్తశుద్ధి ఉంటే బ్యాంకుల నుంచి తీసుకున్న ఆయా రుణాల మొత్తాన్ని చెల్లించి డిఫాల్టర్ల జాబితా నుంచి కొత్తగా రుణాలు మంజూరు చేయించేలా చర్యలు తీసుకోవాలని డిమాండ్ చేశారు. భట్టి విక్రమార రుణమాఫీకి రూ. 6 వేల కోట్లు విడుదల చేశామని చెప్పితే మంత్రి తుమ్మల నాగేశ్వరరావు రుణమాఫీకి రూ.31 వేల కోట్లు విడుదల అంటున్నారని పేర్కొన్నారు.