బొడ్రాయిబజార్, మే 24 : జూన్ 2న నిర్వహించే తెలంగాణ రాష్ట్ర అవతరణ వేడుకలకు సోనియాగాంధీని ఎలా పిలుస్తారని, ఆమె ఏ హోదాలో తెలంగాణాకు వస్తారని మాజీ మంత్రి, సూర్యాపేట ఎమ్మెల్యే జగదీశ్రెడ్డి ప్రశ్నించారు. శుక్రవారం ఆయన సూర్యాపేటలో మీడియాతో మాట్లాడారు. తెలంగాణ రాష్ట్రం మళ్లీ పరాయి పాలనలోకి వెళ్లిందని ఆందోళన వ్యక్తంచేశారు. కాంగ్రెస్ ప్రభుత్వం అధికారంలోకి వచ్చాక రాష్ట్రంలో సగంకాలం పాలన ఢిల్లీ నుంచి చేయాల్సి వచ్చిందని ఆరోపించారు. రాష్ట్రంలో ఏ పని చేయాలన్నా ఢిల్లీలో అనుమతి తీసుకుని చేయాలని, రాష్ట్ర హక్కులు, నదీ జలాలను హరిస్తున్నారని మండిపడ్డారు. గోదావరిని కావేరికి తరలించడంపై మరో ఉద్యమం తప్పేట్టు లేదని హెచ్చరించా రు. కేసీఆర్ తొమ్మిదేండ్లుగా అద్భుతంగా విద్యుత్తును అందించారని, దాన్ని కొనసాగించడంలో ప్రస్తుత ప్రభు త్వం విఫలమైందని దుయ్యబట్టారు. సెల్ఫోన్ వెలుగుల్లో దవాఖానల్లో ఆపరేషన్లు చేస్తున్నారంటే పరిస్థితి ఎలా ఉందో అర్థం అవుతుందన్నారు. హత్యలు, దాడులు, దౌర్జన్యాలు, కేసులతో ప్రభుత్వాన్ని నడుపుకొందామని కాంగ్రెస్ చూస్తున్నదని దుయ్యబట్టారు. ఎన్నికలు ఎప్పుడొచ్చినా కేసీఆర్ కోసమే ప్రజలు ఎదురు చూస్తుంటారని తెలిపారు. ఎన్నికల ఫలితాల తర్వాత కాంగ్రెస్లోనే చీలికలొస్తాయని జోస్యం చెప్పారు. ఆయన వెంట మాజీ ఎంపీ లింగయ్యయాదవ్, మున్సిపల్ చైర్పర్సన్ అన్నపూర్ణ ఉన్నారు.