హైదరాబాద్, జూన్ 4 (నమస్తే తెలంగాణ): ఇంటర్న్షిప్ ద్వారా చదువుకొంటూనే పరిశ్రమల పనితీరును తెలుసుకోవడం.. నైపుణ్యాలను ఆర్జించవచ్చు. ఇలాంటి ఇంటర్న్షిప్ను ఇటీవలికాలంలో విద్యాసంస్థలు, కాలేజీలు విరివిగా ప్రోత్సహిస్తున్నాయి. విద్యార్థులు కూడా ఉత్సాహంగా ఇంటర్న్షిప్లలో చేరుతున్నారు. ప్రభుత్వ, ప్రైవేట్ అన్న తేడాల్లేకుండా పలు ప్రతిష్ఠాత్మక సంస్థలు ఇంటర్న్షిప్కు అవకాశం కల్పిస్తున్నాయి. కొన్ని సంస్థలు సొంతంగా విద్యార్థులే వెతుక్కోవాలని సూచిస్తుండగా, మరికొన్ని నిర్దేశిత రంగంలో, నిర్దేశిత కంపెనీలోనే ఇంటర్న్షిప్ను ప్రోత్సహిస్తున్నాయి. మన దగ్గర ప్రతిష్టాత్మక విద్యాసంస్థలైన డీఆర్డీవో, బీహెచ్ఈఎల్, ఐటీ కంపెనీలు, బిట్స్ విద్యాసంస్థలు ఇంటర్న్షిప్ను అమలుచేస్తున్నాయి.
మా కాలేజీలో అన్ని కోర్సుల్లో ఇంటర్న్షిప్ను తప్పనిసరిగా అమలుచేస్తున్నాం. మొదటి సంవత్సరంలో ఫీల్డ్ వర్క్ ఉంటుంది. ఆ తర్వాత ఆరు సెమిస్టర్లలో ఇంటర్న్షిప్కు అవకాశం కల్పిస్తున్నాం. విద్యార్థులు నాలుగు వారాల పాటు ఇంటర్న్షిప్ చేస్తారు. మా కాలేజీ విద్యార్థి ఒకరు మలేషియా యూనివర్సిటీలో 6 నెలల పాటు ఇంటర్న్షిప్కు ఎంపికయ్యారు. వీ హబ్ సహాయాన్ని పొందుతున్నారు. విద్యార్థులు బీహెచ్ఈఎల్, డీఆర్డీవో వంటి ప్రతిష్టాత్మక కంపెనీల్లో ఇంటర్న్షిప్లు చేస్తున్నారు. ఇంటర్న్షిప్ చేసినందుకు ఆర్థిక సహాయాన్ని పొందుతున్నారు.
– డాక్టర్ లత, సీఎస్ఈ ప్రొఫెసర్, స్టాన్లీ మహిళా ఇంజినీరింగ్ కాలేజీ
మాది అటానమస్ కాలేజీ. మా కాలేజీలో మూడో సంవత్సరం మొదటి సెమిస్టర్లో ఇంటర్న్షిప్ను అమలుచేస్తున్నాం. దీని వ్యవధి 3 నుంచి 6 నెలల పాటు ఉంటుంది. మా కాలేజీ విద్యార్థి ఒకరికి అమెజాన్ కంపెనీలో ఇంటర్న్షిప్ లభించింది. ఆ విద్యార్థికి రూ.లక్ష పారితోషికం లభిస్తున్నది. ఇంటర్న్షిప్ చేసిన వారికి ఒక క్రెడిట్ను జారీచేస్తున్నారు. ఈ క్రెడిట్ను విద్యార్థులు పాస్ కోసం వినియోగించుకోవచ్చు. కొందరు విద్యార్థులు వారే ఇంటర్న్షిప్లను వెతుక్కొంటున్నారు. దీని ద్వారా వారి కాళ్లమీద వాళ్లు నిలబడగలిగే సామర్థ్యాలను పెంపొందించుకోవచ్చు.
– ప్రొఫెసర్ కీర్తి, సీఎస్ఈ విభాగం, గీతాంజలి కాలేజీ ఆఫ్ ఇంజినీరింగ్ అండ్ టెక్నాలజీ