హైదరాబాద్, మార్చి 30 (నమస్తే తెలంగాణ): రాష్ట్రంలోని ఆర్థికశాఖ వద్ద కుప్పలు తెప్పలుగా ఉన్న పెండింగ్ బిల్లుల చెల్లింపు గడువు శనివారంతో ముగిసింది. 2023-24 ఆర్థిక సంవత్సరంలో పెండింగ్ బిల్లుల చెల్లింపులు పూర్తిస్థాయిలో జరగలేదు. మెడికల్ బిల్లులు, ఎరియర్స్, ఇన్సూరెన్స్, జీపీఎఫ్ ఇతర అనేక రకాల బిల్లుల కోసం బాధితులు ఎంతో ఆశతో రాష్ట్ర సచివాలయంలోని ఆర్థికశాఖ అధికారుల వద్ద పడిగాపులు కాశారు.
చివరకు ప్రయోజనం లేదని తెలుసుకొని ఆవేదనతో వెనుదిరిగి వెళ్లిపోయారు. బిల్లుల చెల్లింపుల కోసం బాధితుల నుంచి టోకెన్ల పేరుతో ఫిర్యాదులు స్వీకరించారు. కానీ వాటిలో చాలా తక్కువ సంఖ్యలో క్లియర్ చేసినట్టు తెలిసింది. వచ్చే ఆర్థిక సంవత్సరంలో పెండింగ్ బిల్లుల చెల్లింపునకే ప్రాధాన్యం ఇస్తామని ఉద్యోగులకు అధికారులు నచ్చజెప్పే ప్రయత్నం చేశారు. పెండింగ్ బిల్లులు చెల్లించే అంశంలో సీఎం, డిప్యూటీ సీఎం స్పందించి తమకు తగిన న్యాయం చేయాలని ఉద్యోగ సంఘాల ప్రతినిధులు కోరుతున్నారు.