Traditional Occupations | సకల జనులు చేయి చేయి కలిపిన క్షణాలు.. సమస్త వృత్తులు సమ్మెకు దిగిన సమర దృశ్యాలు.. తెలంగాణ ఉద్యమంలో అజరామరంగా నిలిచిన ఘట్టాలవి. కలబడి, నిలబడి, పోరాడి సాధించుకున్న తెలంగాణ రాష్ట్రం పదో వసంతంలోకి అడుగుపెడుతున్న వేళ.. నడిచొచ్చిన బాటను, కలిసివచ్చిన వర్గాలను గుర్తు చేసుకుంటున్నది కేసీఆర్ ప్రభుత్వం. పదేండ్ల పండుగ సందర్భంలో పలు కీలక నిర్ణయాలను తీసుకున్నది. మరింత ఆర్థిక చేయూతను కులవృత్తులకు కానుకగా ప్రకటించింది.
కులవృత్తులకు పూర్వవైభవం తీసుకువచ్చేందుకు శ్రమిస్తున్న రాష్ట్ర ప్రభుత్వం.. వృత్తిదారులకు లక్ష రూపాయల చొప్పున ఆర్థికసాయం అందించాలని నిర్ణయించింది. దీనికి సంబంధించిన విధివిధానాలపై మత్రివర్గ ఉపసంఘాన్ని ఏర్పాటు చేసింది. గురువారం సీఎం కేసీఆర్ అధ్యక్షతన జరిగిన మంత్రివర్గ సమావేశం పలు కీలక నిర్ణయాలను తీసుకున్నది.
తెలంగాణ వచ్చిననాటికి భయంకరమైన పరిస్థితులు ఉండె. కులవృత్తులు కూలిపోయినయ్. సమైక్యపాలనలో దారుణంగా ధ్వంసమైనయ్. ఇటు రైతులు, అటు చేనేత కార్మికుల ఆత్మహత్యలు. అధికారంలోకి రాగానే కులవృత్తులు కుదుటపడేలా చేస్తానని ఆనాడే చెప్పిన. మెల్లగా ఒక్కొక్కటి కూడదీసుకున్నం. కష్టాలనుంచి గట్టెక్కే దిశగా పోతున్నం. గొల్లకుర్మలు, మత్స్యకార్మికులు, చేనేత, గీతకార్మికులు, రజక, నాయీబ్రాహ్మణులు, విశ్వబ్రాహ్మణులు.. ఇలా అందరినీ ఆదుకుంటూ ముందుకుపోతున్నం.
– 2019 ఎన్నికల ఫలితాల అనంతరం సీఎం కేసీఆర్
హైదరాబాద్, మే 18 (నమస్తే తెలంగాణ): రాష్ట్రంలో కుల వృత్తులనే నమ్ముకొని జీవిస్తున్న విశ్వబ్రాహ్మణ, నాయీ బ్రాహ్మణ, రజక, కుమ్మరి, మేదరి వంటి కులాలవారిని ఆదుకొనేందుకు రాష్ట్ర ప్రభుత్వం కీలక నిర్ణయం తీసుకొన్నది. కులవృత్తులు చేస్తున్నవారికి రూ.లక్ష వరకు ఆర్థిక సాయం అందించాలని నిర్ణయించింది. ఇందుకోసం విధివిధానాల రూపకల్పనకు బీసీ సంక్షేమ శాఖ మంత్రి గంగుల కమలాకర్ నేతృత్వంలో మంత్రులు శ్రీనివాస్గౌడ్, తలసాని శ్రీనివాస్ యాదవ్, వేముల ప్రశాంత్రెడ్డి, జగదీశ్రెడ్డితో క్యాబినెట్ సబ్ కమిటీని ఏర్పాటుచేసింది. విధివిధానాలు ఖరారై, లబ్ధిదారుల ఎంపిక వేగంగా జరిగితే వచ్చే నెల 2వ తేదీ నుంచి నిర్వహించే తెలంగాణ రాష్ట్ర ఆవిర్భావ దశాబ్ది ఉత్సవాల్లోనే ఆయా వర్గాలకు ఆర్థిక సహాయం అందించాలని ప్రభుత్వం భావిస్తున్నది.
తెలంగాణ దశాబ్ది ఉత్సవాలను అత్యంత వైభవోపేతంగా నిర్వహించాలని రాష్ట్ర మంత్రి వర్గం నిర్ణయించింది. 21 రోజులపాటు అన్ని నియోజకవర్గ కేంద్రాల్లో సంబరాలు జరపాలని నిర్ణయం తీసుకొన్నది. ముఖ్యమంత్రి కే చంద్రశేఖర్రావు అధ్యక్షతన గురువారం సచివాలయంలో క్యాబినెట్ సమావేశం జరిగింది. నూతన సచివాలయంలో మొదటి మంత్రివర్గ సమావేశం ఇదే. ఈ సమావేశంలో పలు కీలక నిర్ణయాలను తీసుకొన్నారు. ఆ వివరాలను మంత్రులు హరీశ్రావు, వేముల ప్రశాంత్రెడ్డి, మల్లారెడ్డి, గంగుల కమలాకర్, తలసాని శ్రీనివాస్ యాదవ్ మీడియాకు వెల్లడించారు.
సీఎం కేసీఆర్ తొమ్మిదేండ్ల పాలనలో తెలంగాణ రాష్ట్రం దేశానికే ఆదర్శంగా నిలిచిందని మంత్రి హరీశ్రావు చెప్పారు. ఒకప్పుడు 10 జిల్లాల తెలంగాణలో 9 జిల్లాలను వెనుకబడిన ప్రాంతాలుగా కేంద్ర ప్రభుత్వం నిర్ధారించిందని, అలాంటి ప్రాంతం ఇప్పుడు 33 జిల్లాల తెలంగాణ రాష్ట్రంగా మారి అన్ని రంగాల్లోనూ దేశానికే రోల్ మాడల్గా నిలిచిందని పేర్కొన్నారు. దేశంలో అత్యంత వేగంగా అభివృద్ధి చెందిన రాష్ట్రంగా రికార్డు సృష్టించిందని చెప్పారు. దశాబ్ది ఉత్సవాల ద్వారా తొమ్మిదేండ్ల పాలనలో తెలంగాణ సాధించిన విజయాలను ప్రపంచానికి చాటి చెప్తామని తెలిపారు. 21 రోజులపాటు ఒక్కో రోజు ఒక్కో రంగానికి సంబంధించిన విజయాలను ప్రజలకు వివరిస్తామని చెప్పారు.
‘సాధారణంగా కొన్ని రాష్ర్టాలు ఏదో ఒక రంగంలో విజయం సాధిస్తాయి. తెలంగాణ మాత్రం అన్ని రంగాల్లోనూ దేశంలోనే ఛాంపియన్గా నిలిచింది. కేంద్ర ప్రభుత్వం ఏ రంగంలో అవార్డులు ప్రకటించినా కచ్చితంగా అందులో తెలంగాణకే అధిక వాటా దక్కుతున్నది. సీఎం కేసీఆర్ అద్భుత పాలన వల్లే ఇది సాధ్యమైంది’ అని మంత్రి హరీశ్రావు పేర్కొన్నారు. విప్లవాత్మక పథకాలు ప్రవేశపెట్టడంతోపాటు కాళేశ్వరం ప్రాజెక్టు, త్వరలో పూర్తికానున్న పాలమూరు-రంగారెడ్డి ఎత్తిపోతల, అంబేద్కర్ మహా విగ్రహం, నూతన సచివాలయం, అమర జ్యోతి వంటి పెద్దపెద్ద నిర్మాణాలను రికార్డు సమయంలో పూర్తి చేసి తెలంగాణ సత్తా చాటిందని అన్నారు. వీటన్నింటినీ ప్రజలకు వివరిస్తామని తెలిపారు.
ఒకప్పుడు వెనుకబడిన తెలంగాణ ప్రాంతం.. ఇప్పుడు దేశంలోనే అత్యధికంగా వరి పండిచే రాష్ట్రంగా ఎదిగిందని మంత్రి హరీశ్రావు గుర్తు చేశారు. దీనికి సీఎం కేసీఆర్ నిర్ణయాలే కారణమని స్పష్టం చేశారు. రైతుబిడ్డగా, రైతుల ఇబ్బందులు తెలిసిన వ్యక్తిగా సీఎం కేసీఆర్ మిషన్ కాకతీయ, రైతుబంధు, రైతుబీమా, ఉచిత విద్యుత్తు వంటి పథకాలు ప్రవేశపెట్టడంతోపాటు ప్రాజెక్టులు నిర్మించి నీళ్లు అందించడం వల్లే ఇది సాధ్యమైందని చెప్పారు. అయితే ఇటీవలి వడగళ్ల వాన, అకాల వర్షాలతో రైతులు తీవ్రంగా నష్టపోయారని ఆవేదన వ్యక్తంచేశారు. ప్రభుత్వం ఎన్నిరకాలుగా సాయం చేసినా, ప్రకృతి విపత్తులు నష్టం చేస్తున్నందున ఏప్రిల్లో వచ్చే అకాల వర్షాలు, వడగండ్ల వానల నుంచి తప్పించుకొనేందుకు పంట కాలాన్ని ఒక నెల ముందుకు జరపాలని క్యాబినెట్ నిర్ణయించినట్టు చెప్పారు. దీనిపై మంత్రి నిరంజన్రెడ్డి నేతృత్వంలో కమిటీని వేశామని, ఈ కమిటీ పంటకాలంపై అధ్యయనం చేయడంతోపాటు ఎలా అమలు చేయాలో వివరిస్తూ నివేదిక ఇస్తుందని చెప్పారు. నివేదిక ఆధారంగా అధికారులను సమన్వయం చేస్తూ, రైతులకు అవగాహన కల్పిస్తారని తెలిపారు. ఈ వానకాలం సాగు నుంచే దీనిని అమలు చేసేలా యుద్ధ ప్రాతిపదికన చర్యలు తీసుకొంటామని చెప్పారు.
రాష్ట్రంలో జిల్లాలు 33కు పెరిగిన నేపథ్యంలో వైద్యారోగ్య రంగాన్ని పటిష్ఠం చేసేందుకు ప్రతి జిల్లాకు ఒక డీఎంహెచ్వో పోస్టును క్యాబినెట్ మంజూరు చేసింది. సుమారు కోటి జనాభా ఉన్న హైదరాబాద్లో ఒక్క డీఎంహెచ్వోతో పర్యవేక్షణ కష్టంగా మారింది. ప్రస్తుతం జీహెచ్ఎంసీలో పాలన కోసం హైదరాబాద్ను ఆరు జోన్లుగా విభజించారు. ఇదే తరహాలో ప్రతి జోన్కు ఒక డీఎంహెచ్వో పోస్టును క్యాబినెట్ మంజూరు చేసింది. మిగతా 32 జిల్లాల్లో 32 డీఎంహెచ్వో, హైదరాబాద్లో 6 కలిపి 38 మంది డీఎంహెచ్వోలు అందుబాటులోకి రానున్నారు. దీంతో ప్రజల ఆరోగ్యంపై పర్యవేక్షణ పెరగడంతోపాటు, మెరుగైన సేవలు అందుతాయి.
రాష్ట్రంలో రెండో విడత గొర్రెల పంపిణీని రాబోయే 10-15 రోజుల్లో ప్రారంభించాలని క్యాబినెట్ నిర్ణయించింది. నిధులకు సంబంధించి కేంద్ర ప్రభుత్వం నుంచి ఏవైనా ఇబ్బందులు తలెత్తితే రాష్ట్ర ప్రభుత్వమే సొంతంగా నిధులు సమకూర్చుకొని, పంపిణీకి అంతరాయం లేకుండా చూడాలని నిర్ణయించారు.
పాలనా సంస్కరణల్లో భాగంగా ప్రభుత్వం రాష్ట్రంలో అనేక కొత్త మండలాలను ఏర్పాటు చేసింది. ప్రతి మండలానికి ఒక పీహెచ్సీ ఉండాలి. అయితే కొన్ని కొత్త మండలాల్లో పీహెచ్సీలు లేవని ప్రభుత్వం గుర్తించింది. 40 కొత్త మండలాల్లో పీహెచ్సీలు ఏర్పాటు చేయాలని క్యాబినెట్ నిర్ణయించింది. దీంతో ఆయా మండలాల్లో వైద్య వసతులు మరింత మెరుగపడనున్నాయి. వనపర్తి జిల్లా ఘనపురం మండలం కర్నెతండాలో పీహెచ్సీ మంజూరు చేసింది. కొత్తగా 8 పోస్టులు కేటాయించింది. ముధోల్ మండలంలో కొత్తగా సీహెచ్సీ ఏర్పాటుకు క్యాబినెట్ నిర్ణయించింది. ఇందులో 28 పోస్టులు మంజూరు చేసింది. దీంతో ఈ మండలంతోపాటు చుట్టుపక్కల ఉన్న మరిన్ని మండలాలకు పెద్ద దవాఖాన, ఐసీయూ వంటి సేవలు అందుబాటులోకి రానున్నాయి. రాష్ట్రవ్యాప్తంగా ఉన్న అర్బన్ పీహెచ్సీల్లో ప్రస్తుతం కాంట్రాక్ట్ ఉద్యోగులే పనిచేస్తున్నారు. వీరి స్థానంలో శాశ్వత ఉద్యోగులను తీసుకోవాలని ప్రభుత్వం నిర్ణయించింది.
రాష్ట్రంలో యాసంగి సీజన్ ఏప్రిల్ నెలాఖరు వరకు కొనసాగుతుండటంతో అకాల వర్షాలు, వడగండ్ల వానకు చేతికొచ్చిన పంట నాశనమవుతున్నది. ఇటీవల కురిసిన అకాల వర్షాలకు రైతులు తీవ్రంగా నష్టపోయారు. దీనిని నివారించేందుకు పంట కాలాన్ని ఒక నెల ముందుకు జరపాలని ప్రభుత్వం నిర్ణయించింది. మార్చి ఆఖరు వరకే కోతలు, కొనుగోళ్లు పూర్తయ్యేలా చేయగలిగితే.. ఏప్రిల్లో వచ్చే అకాల వర్షాల నష్టం నుంచి రైతులు తప్పించుకోవచ్చని ప్రభుత్వం భావిస్తున్నది. ఈ వానకాలం నుంచే దీనిని అమలు చేయాలని భావిస్తున్నది. ఇందుకోసం వ్యవసాయ శాఖ మంత్రి నిరంజన్రెడ్డి ఆధ్వర్యంలో మంత్రులు గంగుల కమలాకర్, అజయ్ కుమార్, మల్లారెడ్డి, ఇంద్రకరణ్రెడ్డితో క్యాబినెట్ సబ్ కమిటీ ఏర్పాటు చేసింది. వీరు వ్యవసాయ శాఖ అధికారులు, నిపుణులతో చర్చించి, యుద్ధ ప్రాతిపదికన అమలుకు కార్యాచరణ రూపొందించనున్నారు.
మార్కెట్లో ప్రస్తుతం మక్కలు, జొన్నలకు ధరలు పడిపోతున్నాయి. ఈ నేపథ్యంలో రైతులు నష్టపోకుండా ప్రభుత్వమే మక్కలు, జొన్నలు కొనుగోలు చేయాలని మంత్రివర్గం నిర్ణయించింది. ధరల స్థిరీకరణకు అవసరమైన నిధుల సేకరణకు ప్రభుత్వం గ్యారంటీగా ఉండనున్నది. ఇప్పటికే రాష్ట్రవ్యాప్తంగా కొనుగోలు కేంద్రాలను ఏర్పాటుచేసి వరి ధాన్యాన్ని మొత్తం ప్రభుత్వమే కొంటున్నది. దీంతో వరి రైతులకు గిట్టుబాటు ధర లభిస్తున్నది. క్యాబినెట్ నిర్ణయంతో మక్క, జొన్న రైతులకు కూడా గిట్టుబాటు ధర లభించనున్నది.
రాష్ట్రంలో ఒక్క రైతు కూడా నష్టపోకుండా నకిలీ విత్తనాల విషయంలో అత్యంత కఠినంగా వ్యవహరించాలని క్యాబినెట్ నిర్ణయం తీసుకున్నది. ఇందుకోసం క్యాబినెట్ సమావేశంలో ప్రత్యేకంగా డీజీపీని భాగస్వామిని చేసి చర్చించింది. కల్తీకి పాల్పడేవారు ఎంతటివారైనా ఉపేక్షించవద్దని, పీడీ యాక్ట్ పెట్టి అరెస్ట్ చేయాలని ఆదేశాలు జారీ చేసింది. కలెక్టర్లు, వ్యవసాయ శాఖ అధికారులు, విజిలెన్స్ అధికారులు, పోలీసులు బృందాలుగా ఏర్పడి ఎప్పటికప్పుడు తనిఖీలు చేయాలని క్యాబినెట్ సూచించింది. సీఎస్, డీజీపీ ఎప్పటికప్పుడు పరిస్థితిని సమీక్షించి, పర్యవేక్షించాలని ఆదేశించింది. ఈ అంశంపైనా సబ్ కమిటీ పనిచేయనున్నది.
నాగర్కర్నూల్ జిల్లా అచ్చంపేట నియోజకవర్గంలో ఉమా మహేశ్వర లిఫ్ట్ ఇరిగేషన్ ఫేజ్-1, ఫేజ్-2 నిర్మాణానికి క్యాబినెట్ ఆమోదం తెలిపింది. దీంతో నియోజకవర్గ పరిధిలోని సుమారు 71,600 ఎకరాలకు ప్రయోజనం చేకూరనున్నది. వనపర్తి జిల్లా ఏదుల రిజర్వాయర్ నుంచి దాదాపు 25 కిలోమీటర్ల పొడవైన కాల్వ నుంచి లింగాల మండలం సూరారంలో నిర్మించే 2.5 టీఎంసీల సామర్థ్యం ఉన్న ఉమామహేశ్వర రిజర్వాయర్కు నీటిని తరలిస్తారు. ఈ నీటిని బల్మూర్, కొండనాగుల, మైలారం గ్రామాల పరిధిలో నిర్మించే లిఫ్టుతో ఆయకట్టుకు ఎత్తిపోస్తారు. ఇలా అచ్చంపేట, ఉప్పునుంతల, బల్మూర్ మండలాల్లోని ఆయకట్టుకు సాగునీరు అందనున్నది. ఇప్పటి వరకు ఎంజీకేఎల్ఐ పరిధిలో అచ్చంపేటలో 3 వేల ఎకరాలకు మాత్రమే సాగునీరు అందుతున్నది. ఇక స్టేజ్-2 పనుల్లో భాగంగా మన్ననూర్ వద్ద నిర్మించే ప్రతిపాదిత చెన్నకేశవ రిజర్వాయర్తో అమ్రాబాద్, పదరకు సాగునీరు చేరనున్నది. ప్రముఖ పుణ్యక్షేత్రమైన ఉమామహేశ్వరుని పేరును ఈ రిజర్వాయర్కు పెట్టారు.
తెలంగాణ రాష్ట్ర పబ్లిక్ సర్వీస్ కమిషన్ (టీఎస్పీఎస్సీ)ను మరింత బలోపేతం చేయాలని క్యాబినెట్ నిర్ణయించింది. ఈ సంస్థ పరీక్షలను మరింత పకడ్బందీగా నిర్వహించేందుకు ప్రభుత్వం 10 కొత్త పోస్టులను మంజూరు చేసింది. అసిస్టెంట్ ఎగ్జామినేషన్ కంట్రోలర్, సెక్యూరిటీ సూపర్వైజర్ వంటి పోస్టులు రానున్నాయి. అత్యంత కీలకమైన గ్రూప్-1, గ్రూప్-2 పోస్టులతోపాటు అనేక విభాగాల్లో ఖాళీల భర్తీకి టీఎస్పీఎస్సీయే పరీక్షలు నిర్వహిస్తున్నది. దీంతో కమిషన్పై పనిభారం తీవ్రంగా ఉన్నది. ఇదే అదనుగా తీసుకొని కమిషన్లోని కొందరు తాత్కాలిక ఉద్యోగులు అధికార దుర్వినియోగానికి పాల్పడి పలు పరీక్ష పేపర్లను ఇటీవల లీక్ చేశారు. ఈ అంశాన్ని సీరియస్గా తీసుకొన్న ప్రభుత్వం.. కమిషన్లో శాశ్వత ఉద్యోగుల సంఖ్యను పెంచాలని నిర్ణయించింది. పనిభారాన్ని తగ్గించేందుకు ఉద్యోగుల సంఖ్యను పెంచాలని ప్రభుత్వం గతంలోనే నిర్ణయించింది.
సీఎం కేసీఆర్ హామీ ఇచ్చిన మేరకు ఖమ్మంలో జర్నలిస్టులకు ఇండ్ల స్థలాల కోసం 23 ఎకరాల భూమిని కేటాయిస్తూ క్యాబినెట్ నిర్ణయం తీసుకొన్నది. దీంతోపాటు వనపర్తిలో జర్నలిస్టు భవనం నిర్మాణానికి 10 గుంటల స్థలం కేటాయించాలని తీర్మానించింది. గతంలో ఖమ్మంలో బీఆర్ఎస్ సభ జరిగిన నెల రోజుల్లోపే ప్రభుత్వం నుంచి ఖమ్మం అర్బన్ రెవెన్యూ పరిధిలోని ఐదెకరాల ఇరిగేషన్ శాఖ స్థలాన్ని జర్నలిస్టులకు కేటాయిస్తూ జీవో జారీ అయింది. కానీ ఆ స్థలాన్ని జర్నలిస్టులందరికీ పంపిణీ చేయడం సాధ్యం కాదని గుర్తించి మంత్రి అజయ్కుమార్.. తిరిగి సీఎం కేసీఆర్ దృష్టికి సమస్యను తీసుకెళ్లారు. దీంతో గురువారం నాటి క్యాబినెట్ సమావేశంలో 23 ఎకరాలను జర్నలిస్టులకు కేటాయించాలని నిర్ణయించారు.
రాష్ట్రం ఏర్పడి పదేండ్లవుతున్న సందర్భంగా జూన్ 2వ తేదీ నుంచి 21 రోజులపాటు రాష్ట్రవ్యాప్తంగా దశాబ్ది ఉత్సవాలు అత్యంత వైభవోపేతంగా నిర్వహించాలని క్యాబినెట్ నిర్ణయించింది. అన్ని నియోజక వర్గ కేంద్రాల్లో సంబురాలు జరపనున్నది. దీంతోపాటు గ్రామ స్థాయి నుంచి రాష్ట్ర స్థాయి వరకు ప్రత్యేక కార్యక్రమాలు నిర్వహించనున్నారు. ఈ ఉత్సవాలను వచ్చే నెల 2న సచివాలయంలో ముఖ్యమంత్రి కేసీఆర్ ప్రారంభిస్తారు. అదే సమయంలో మంత్రులు వారివారి జిల్లాల్లో ఉత్సవాలను ప్రారంభిస్తారు. నియోజకవర్గాల్లో మంత్రుల పర్యవేక్షణలో ఎమ్మెల్యేల నేతృత్వంలో ఉత్సవాలు జరుగుతాయి. బీఆర్ఎస్ ప్రభుత్వం సాధించిన ప్రగతి నివేదనతోపాటు తెలంగాణకే ప్రత్యేకమైన సాంస్కృతిక కార్యక్రమాలతో రాష్ట్ర నలుమూలలు హోరెత్తనున్నాయి.
టీఎస్పీఎస్సీని మరింత బలోపేతం చేయాలని క్యాబినెట్ నిర్ణయించింది. ఈ సంస్థ పరీక్షలను మరింత పకడ్బందీగా నిర్వహించేందుకు ప్రభుత్వం 10 కొత్త పోస్టులను మంజూరు చేసింది. అసిస్టెంట్ ఎగ్జామినేషన్ కంట్రోలర్, సెక్యూరిటీ సూపర్వైజర్ వంటి పోస్టులు రానున్నాయి.
రాష్ట్రం లోని 33 జిల్లాల్లో డీఎంహెచ్వోలు ఉండగా, హైదరాబాద్లో ఒక్కరితో వైద్యసేవల పర్యవేక్షణ కష్టంగా మారింది. ఈ నేపథ్యంలో హైదరాబాద్కు 6 డీఎంహెచ్వో పోస్టులు మంజూరు చేసింది. దీంతో రాష్ట్రంలోని మొత్తం జిల్లా వైద్యారోగ్యశాఖ అధికారుల సంఖ్య 38కి చేరనున్నది.
ముఖ్యమంత్రి కే చంద్రశేఖర్రావు అధ్యక్షతన గురువారం జరిగిన మంత్రివర్గ సమావేశం మూడున్నర గంటలపాటు సాగింది. వివిధ అంశాలపై క్యాబినెట్ విస్తృతంగా చర్చించింది. నూతనంగా నిర్మించిన డాక్టర్ బీఆర్ అంబేద్కర్ రాష్ట్ర సచివాలయంలో ఇదే తొలి మంత్రివర్గ సమావేశం.