హైదరాబాద్, మే 28 (నమస్తే తెలంగాణ): రాష్ట్రంలో రానున్న మూడు రోజులు పొడి వాతావరణం ఉండనున్నదని, ఉష్ణోగ్రతలు మూడు డిగ్రీలు పెరగవచ్చని హైదరాబాద్ వాతావరణ శాఖ తెలిపింది. బుధ, గురువారాల్లో ఉష్ణోగ్రతలు 40 నుంచి 44 డిగ్రీల మధ్య ఉండవచ్చని పేర్కొన్నది. నైరుతి రుతుపవనాలు రాగల 3 నుంచి 4రోజుల్లో కేరళలో ప్రవేశించేందుకు పరిస్థితులు అనుకూలంగా మారాయని ప్రకటించింది.
బంగాళాఖాతంలో కల్లోలం సృష్టించిన రెమల్ తుఫాను తీరాన్ని తాకింది. దీని ప్రభావంతో రాష్ట్రంలో వర్షాలు కురవొచ్చని తెలిపారు. ఈ తుఫాను కారణంగా మెదక్, సంగారెడ్డి, రంగారెడ్డి, మేడ్చల్-మలాజిగిరి, హైదరాబాద్, మహబూబ్నగర్, సూర్యాపేట, నల్లగొండ, కామారెడ్డి, ఆదిలాబాద్, భద్రాద్రి, నిర్మల్ జిల్లాల్లో వర్షాలు కురిసే అవకాశం ఉన్నదని పేర్కొన్నారు. ఈ మేరకు ఆయా జిల్లాలకు ఎల్లో అలర్ట్ జారీ చేశారు.