హైదరాబాద్, జూలై 10 (నమస్తే తెలంగాణ) : పాతబస్తీ విద్యుత్తు బిల్లుల సేకరణను ప్రైవేట్ కంపెనీ అయిన అదానీ గ్రూప్నకు ఇవ్వడాన్ని విద్యుత్తు ఉద్యోగులు తీవ్రంగా వ్యతిరేకిస్తున్నారు. ఈ చర్యలను ప్రభు త్వం తక్షణమే విరమించుకోవాలని డిమాండ్ చేశారు. తెలంగాణ పవర్ ఎంప్లాయీస్ జేఏసీ ప్రతినిధి బృందం బుధవారం దక్షిణ తెలంగాణ విద్యుత్తు పంపిణీ సంస్థ (టీజీఎస్పీడీసీఎల్) సీఎండీ ముషారఫ్ ఫారూఖీని కలిసి వినతిపత్రాన్ని సమర్పించింది. ఈ సందర్భంగా జేఏసీ నేతలు మాట్లాడుతూ విద్యుత్తు సరఫరాను ప్రైవేట్ కంపెనీలకు అప్పగించే ఆలోచనను ప్రభుత్వం తక్షణమే విరమించుకోవాలని డిమాండ్ చేశారు.
నష్టాల సాకుతో పంపిణీ వ్యవస్థను ప్రైవేటీకరించడం సరికాదని అన్నారు. ప్రైవేట్ కంపెనీలు లాభాపేక్షతో వినియోగదారులపై అదనపు భారాన్ని మోపుతాయని, కొన్ని రాష్ర్టాల్లో విద్యుత్తు పంపిణీ ప్రైవేటీకరణ, ఫ్రాంచైజీ ప్రయోగాలు ఆశించిన ఫలితాలివ్వలేదని గుర్తుచేశారు. హైదరాబాద్ సౌత్ సర్కిల్లో నష్టాలను యాజమాన్యం మద్దతుతో తగ్గించుకోవచ్చని, ఈ అంశాన్ని ప్రభుత్వం దృష్టికి తీసుకెళ్లి సమస్య పరిష్కారానికి కృషిచేయాలని సీఎండీని కోరారు. ఈ కార్యక్రమంలో జేఏసీ చైర్మన్ జీ సాయిబాబా, కన్వీనర్ రత్నాకర్రావు, కో కన్వీనర్ బీసీరెడ్డి, ఆర్గనైజింగ్ సెక్రటరీ సుధాకర్రెడ్డి, ఏ వెంకటనారాయణరెడ్డి, పీ సదానందం, వేణు, శ్రీనివాస్, జనప్రియ తదితరులు పాల్గొన్నారు.