హైదరాబాద్, జూలై 4 (నమస్తే తెలంగాణ): తెలంగాణ రైతాంగ సాయుధ పోరాటయోధుడు, దొడ్డి కొమురయ్య 78వ వర్ధంతిని శాసనసభాప్రాంగణంలో గురువారం నిర్వహించారు. శాసనమండలి చైర్మన్ గుత్తా సుఖేందర్రెడ్డి, శాసనసభ స్పీకర్ గడ్డం ప్రసాద్కుమార్, తెలంగాణ లెజిస్లేచర్ సెక్రటరీ నరసింహాచార్యులు దొడ్డి కొమురయ్య చిత్రపటానికి పూలమాలలు వేసి నివాళులర్పించారు. కార్యక్రమంలో సీఎల్పీ కార్యదర్శి శ్రీకాంత్, చీఫ్ మార్షల్ కరుణాకర్, శాసనమండలి, శాసనసభ ఉద్యోగులు పాల్గొన్నారు.
నేడు రాష్ర్టానికి జస్టిస్ పీసీ ఘోష్
హైదరాబాద్, జూలై 4 (నమస్తే తెలంగాణ) : కాళేశ్వరం ప్రాజెక్టుపై ఏర్పాటు చేసిన విచారణ కమిషన్కు నేతృత్వం వహిస్తున్న విశ్రాంత న్యాయమూర్తి పీసీ ఘోష్ శుక్రవారం హైదరాబాద్కు రానున్నారు. ఇప్పటికే విచారణ ప్రారంభించిన ఆయన గత నెల 6 నుంచి 16 వరకు ఇక్కడే ఉండి ఇంజినీర్లు, నిర్మాణ ఏజెన్సీ ప్రతినిధుల నుంచి వివరాలు సేకరించారు. కమిషన్ ఎదుట వెల్లడించిన అభిప్రాయాలను అఫిడవిట్ల రూపంలో జూన్ 28లోగా దాఖలు చేయాలని ఆదేశించారు. గడువు ముగిసిపోగా తదుపరి విచారణ ప్రక్రియను కొనసాగించేందుకు ఘోష్ రాష్ర్టానికి వస్తున్నట్లు తెలిసింది.