హైదరాబాద్, జూలై 25 (నమస్తే తెలంగాణ): గొర్రెల పంపిణీ పథకానికి కాంగ్రెస్ ప్రభుత్వం తిలోదకాలు ఇచ్చింది. ఇప్పటికే లబ్ధిదారులు చెల్లించిన డీడీలను తిరిగి ఇచ్చేస్తుండగా, బడ్జెట్లో నిధులు కేటాయించకపోవడంతో ప్రభుత్వం ఈ పథకాన్ని నిలిపేసినట్టేననే అనుమానాలు మరింత బలపడుతున్నాయి. పాల ఉత్పత్తికి అనుగుణంగా గత బీఆర్ఎస్ ప్రభుత్వం మెగా డెయిరీని నిర్మించింది. కాంగ్రెస్ ప్రభుత్వం ఆ డెయిరీ మెయింటనెన్స్కు నిధులు కేటాయించకపోవడం విమర్శలకు దారితీస్తున్నది. మత్స్యకారులకు ఆర్థిక భరోసా కల్పించేందుకు గత ప్రభుత్వం చేపట్టిన ఉచిత చేపపిల్లల పంపిణీపై కాంగ్రెస్ ప్రభుత్వం శీతకన్ను వేసింది. ఈ ఏడాది చేప పిల్లల పంపిణీకి రూ.100 కోట్లు అవసరం కానుండగా రూ.20 కోట్లే కేటాయించింది. మత్స్యకారుల ఇన్సూరెన్స్కు ఒక్క రూపాయి కూడా కేటాయించలేదు. వెటర్నరీ కాలేజీల్లో మౌలిక సదుపాయాల కల్పనలోనూ వివక్ష చూపించింది. సిద్దిపేట కాలేజీకి నయా పైసా కేటాయించని ప్రభుత్వం.. సీఎం రేవంత్రెడ్డి నియోజకవర్గం కొడంగల్ వెటర్నరీ కాలేజీకి రూ. 6.50 కోట్లు కేటాయించింది. పెబ్బేరులోని షిషరీస్ కాలేజీకి పైసా కేటాయించలేదు.