Govt Schools | హైదరాబాద్, జూన్ 2 (నమస్తే తెలంగాణ): పాఠశాలలు పునఃప్రారంభయ్యే జూన్ 12నే విద్యార్థులకు రెండుజతల యూనిఫాంలు ఇవ్వాలి. ఇది విద్యాశాఖ అధికారుల ఆదేశాలు. కానీ అధికారుల అలసత్వం, ముందస్తు ప్రణాళిక లేకపోవడంతో ఒక జత యూనిఫాం మాత్రమే అందజేయనున్నారు. ఇక జూన్ నెలాఖరులో లేదంటే జూలై మొదటి వారంలో మరో జత ఇస్తారు. దీంతో కొత్త విద్యాసంవత్సరంలో ప్రభుత్వ పాఠశాలల్లో అడుగుపెడుతున్న విద్యార్థులకు రెండు జతల యూనిఫాంల పంపిణీ కష్టంగానే కనబడుతుంది.
రాష్ట్రంలో 2024 విద్యాసంవత్సరానికి దాదాపు 21లక్షల మంది విద్యార్థులకు రెండు జతల చొప్పున యూనిఫాంలు ఇవ్వాలని విద్యాశాఖ నిర్ణయించింది. ఇందుకు మొత్తం 90 లక్షల మీటర్ల వస్త్రం అవసరమని తేల్చింది. దీనిని టెస్కో ద్వారా సేకరిస్తున్నారు. కానీ కేవలం ఇందులో సగం..అంటే 45 లక్షల మీటర్ల వస్త్రం మాత్రమే జి ల్లాలకు చేరింది. దీంతో కేవలం 40 శాతం యూనిఫాంలే సిద్ధమయ్యాయి. మిగిలిన 45 లక్షల మీటర్ల వస్త్రం జూన్ నెలాఖరులో అందనుంది.