BJP | హైదరాబాద్, ఆగస్టు 16 (నమస్తే తెలంగాణ): ‘పంచాయతీ సెక్రటరీల పంచాయితీ ముగిసింది.. వీఆర్ఏల సర్దుబాటు పూర్తయింది.. ఆర్టీసీ విలీనం అమలైంది.. డబుల్బెడ్రూం ఇండ్ల పంపిణీ కొనసాగుతున్నది.. ఇక ఏ నినాదంతో ప్రజల్లోకి వెళ్దాం? ఏ అంశాన్ని పట్టుకొని ప్రభుత్వాన్ని విమర్శిద్దాం?’ ఇప్పుడు రాష్ట్ర బీజేపీలో జరుగుతున్న అంతర్మథనం ఇది. వచ్చే ఎన్నికల కోసం ఏ విషయాన్ని ఎత్తుకోవాలో తెలియక బీజేపీ రాష్ట్ర నాయకత్వం తల పట్టుకుంటున్నది. దీంతో లీడర్లు, క్యాడర్ మొత్తం సైలెంట్ అయ్యారు.
వ్యవసాయం, రైతులు, విద్య, వైద్యం, పోలీసింగ్.. ఇలా ఏ అంశాన్ని చూసినా తెలంగాణ దేశంలోనే అగ్రగామిగా ఉండటం, మరోవైపు కేంద్రం పనితీరు, బీజేపీ రాష్ర్టాల పనితీరు తెలంగాణతో పోల్చితే తీసికట్టుగా ఉండటంతో ఎలా ముందుకుపోవాలో వారికి అర్థం కావడంలేదు. దీంతో నామ్కే వాస్తే ప్రెస్మీట్లు పెట్టి కుటుంబపాలన, అప్పులు వంటి రొడ్డకొట్టుడు ఉపన్యాసాలు ఇచ్చి వెళ్తున్నారని నేతలే చెప్తున్నారు. మరోవైపు రాష్ట్ర అధ్యక్షుడిగా బాధ్యతలు స్వీకరించిన కిషన్రెడ్డి పెద్దగా పట్టించుకోవడం లేదని పార్టీ కార్యకర్తల్లో అసంతృప్తి పెరుగుతున్నది. లోక్సభ సమావేశాల పేరుతో, కమిటీల పేరుతో అనవసరంగా కాలం గడుపుతున్నారని, నేతలకు గానీ, కార్యకర్తలకుగానీ దిశానిర్దేశం చేయడం లేదని మండిపడుతున్నారు. డబుల్బెడ్రూం ఇండ్ల పేరుతో హడావుడి చేసినా, దానిని ప్రజలు పట్టించుకోలేదని చెప్తున్నారు. నాయకులు సైతం తమకు అధిష్ఠానం నుంచి ఏ ఎజెండా లేదని, అందుకే తూతూ మంత్రంగా బయటికి వెళ్లి వస్తున్నామని అంటున్నారు.