హైదరాబాద్, జూలై25 (నమస్తే తెలంగాణ): దివ్యాంగులను కించపరిచేలా ఎక్స్వేదికగా వ్యాఖ్యలు చేసిన సీనియర్ ఐఏఎస్ స్మితా సబర్వాల్ను డిస్మిస్ చేయాలని అఖిల భారత వికలాంగుల హకుల వేదిక డిమాండ్ చేసింది. వేదిక జాతీయ అధ్యక్షుడు కొల్లి నాగేశ్వరరావు నేతృత్వంలో దివ్యాంగ హక్కుల, సంక్షేమ సంఘాల నేతల బృందం వికలాంగుల సంక్షేమ శాఖ ముఖ్యకార్యదర్శి వాకాటి కరుణను గురువారం కలిసి వినతిపత్రం అందజేశారు.
దివ్యాంగులపై సానుభూతి చూపాల్సిన అధికారి కించపరిచేలా మాట్లాడడం రాజ్యాంగ విరుద్ధమని వివరించారు. ఐఏఎస్ అధికారిగా కొనసాగే నైతిక విలువలను కోల్పోయారని, స్మితా సబర్వాల్ను దివ్యాంగుల హకుల చట్టం ప్రకారం శిక్షించి, సస్పెండ్ చేయాలని డిమాండ్ చేశారు. కార్యక్రమంలో వేదిక నాయకులు పులిపాటి శ్రీనివాస్, జంగిల్ శ్రీనివాస్, అందే దయమణి, తాళ్ల మాధవి, మాలెల్ల డేవిడ్, మహేందర్ లావణ్య తదితరులు పాల్గొన్నారు.