హైదరాబాద్, జూన్ 25 (నమస్తే తెలంగాణ): సికింద్రాబాద్ కంటోన్మెంట్లోని సివిల్ ప్రాంతాలు త్వరలో మున్సిపాలిటీల్లో విలీనం కానున్నాయి. ఈ ప్రక్రియను త్వరగా పూర్తిచేయాలని రక్షణశాఖ కార్యదర్శి ఏ గిరిధర్ రాష్ట్ర అధికారులకు సూచించారు. బ్రిటిష్ కాలం నుంచి దేశంలో కొనసాగుతున్న కంటోన్మెంట్ బోర్డులను రద్దు చేయాలని కేంద్ర ప్రభుత్వం కృతనిశ్చయంతో ఉన్నట్టు చెప్పారు.
కంటోన్మెంట్ల పరిధిలోని సివిల్ ప్రాంతాలను మున్సిపాలిటీల్లో విలీనం చేసే విధివిధానాలపై మంగళవారం ఆయన ఢిల్లీ నుంచి వివిధ రాష్ట్రాల సీనియర్ అధికారులతో వీడియో కాన్ఫరెన్స్ నిర్వహించారు. రాష్ట్ర ప్రభుత్వం తరఫున సీఎస్ శాంతి కుమారి ఈ కాన్ఫరెన్స్లో పాల్గొన్నారు. సికింద్రాబాద్ కంటోన్మెంట్ బోర్డు పరిధిలోని సివిల్ ప్రాంతాలను జీహెచ్ఎంసీలో విలీనంచేయాలన్న కేంద్ర ప్రతిపాదనకు రాష్ట్ర ప్రభుత్వం ఇప్పటికే అంగీకరించిందని ఆమె తెలిపారు.
ఈ ప్రక్రియను త్వరగా పూర్తిచేయాలని రాష్ట్ర ప్రభుత్వం పట్టుదలతో ఉన్నట్టు చెప్పారు. సంబంధిత విధివిధానాల ఖరారు కోసం కేంద్రం ఏర్పాటు చేసిన కమిటీ తన నివేదికను ఇంకా రాష్ట్ర ప్రభుత్వంతో పంచుకోలేదని తెలిపారు. వీడియో కాన్ఫరెన్స్లో మున్సిపల్శాఖ ముఖ్య కార్యదర్శి దానకిశోర్, మున్సిపల్, కంటోన్మెంట్ బోర్డు అధికారులు కూడా పాల్గొన్నారు.