హైదరాబాద్, జూన్ 5 (నమస్తే తెలంగాణ): లోక్సభ ఎన్నికల్లో రాష్ట్రంలో 484 మంది అభ్యర్థులకు డిపాజిట్లు గల్లంతయ్యాయి. 17 లోక్సభ స్థానాలకు 525 మంది అభ్యర్థులు బరిలో నిలిచారు. బీఆర్ఎస్, కాంగ్రెస్, బీజేపీకే రాష్ట్రంలో 91 శాతం ఓట్లు పోలయ్యాయి. మిగతా ఓట్లు ఇతర పార్టీలు, నోటాకు వచ్చినట్టుగా ఎన్నికల సంఘం లెక్కతేల్చింది. దీంతో ఇతర పార్టీలకు చెందిన, స్వతంత్ర అభ్యర్థులకు డిపాజిట్లు గల్లంతయ్యాయి. కాంగ్రెస్ నుంచి 16 మందికి, బీజేపీ నుంచి 15 మందికి, బీఆర్ఎస్ నుంచి 9 మందికి, ఎంఐఎం నుంచి ఒకరికి మొత్తంగా 41 మందికే డిపాజిట్లు దక్కాయి. ఎన్నికల కమిషన్ నిబంధనల ప్రకారం చెల్లిన ఓట్లలో ఆరో వంతు లేదా 16.66 శాతం ఓట్లు రావాల్సి ఉంటుంది. అలా అయితేనే డిపాజిట్ వచ్చినట్టుగా పరిగణిస్తారు. దీంతో రాష్ట్రంలో అత్యధికులకు డిపాజిట్లు దక్కలేదు.