ఖలీల్వాడి, జూలై 18: కొంత మంది ఉపాధ్యాయులు, మాజీ టీచర్లు తనను మానసికంగా వేధిస్తున్నారని పోలీసులకు ఫిర్యాదు చేసినట్టు నిజామాబాద్ జిల్లా విద్యాశాఖాధికారి దుర్గాప్రసాద్ తెలిపారు. ఈ మేరకు గురువారం ఆయన ఓ ప్రకటన విడుదల చేశారు. ఈ సందర్భంగా డీఈవో మాట్లాడుతూ.. ఉద్యోగుల బదిలీల విషయంలో తనపై తప్పుడు ప్రకటనలు చేస్తున్నారని వాపోయారు. ఇటీవల జరిగిన పదోన్నతుల్లో సిరికొండ మండలంలో పలు అక్రమాలు జరిగాయని కొన్ని ఉపాధ్యాయ సంఘాలు ఆరోపించాయని, పలువురు టీచర్లు సైతం తమకు అన్యాయం జరిగిందంటూ ఉన్నతాధికారులకు ఫిర్యాదులు చేశారని తెలిపారు.
ఈ నేపథ్యంలోనే కొందరు టీచర్లు తనను వేధిస్తున్నారని ఇటీవల రూరల్ పోలీసులకు ఫిర్యాదు చేసినట్టు పేర్కొన్నారు. విశ్రాంత ఉపాధ్యాయుడు శంతన్, స్కూల్ అసిస్టెంట్ బాలయ్య, ఇతరులు తనపై వ్యక్తిగతంగా ప్రకటనలు చేస్తూ మానసిక క్షోభకు గురిస్తున్నారని ఫిర్యాదులో పేర్కొన్నట్టు వివరించారు. ప్రతి విషయానికి కార్యాలయానికి వచ్చి ఇబ్బందులకు గురిచేస్తున్నారని చెప్పారు. వారి వల్ల తనతోపాటు తన కుటుంబం కూడా ఇబ్బంది పడుతున్నదని, ఈ ఒత్తిడిని తట్టుకోలేకే పోలీసులకు ఫిర్యాదు చేశానని డీఈవో స్పష్టం చేశారు.