Cyber Crime | హైదరాబాద్, జూలై 20 (నమస్తే తెలంగాణ): ఎవరో చేసిన తప్పు.. మరెవరికో ముప్పు తెస్తున్నది. సైబర్ నేరాల్లో ప్రమేయం లేకున్నా, నేరంలో తాను బాధితుడు కాకున్నా కొందరు నిందితులుగా మారుతున్న పరిస్థితులు తలెత్తుతున్నాయి. తమ ఖాతాలకు ఎవరో డబ్బులు పంపితే.. వారిపై ఇంకెవరో ఫిర్యాదు చేస్తే వీరి అకౌంట్లు స్తంభించిపోతున్నాయి. ఇలా చాలామంది అకౌంట్లు ఫ్రీజ్కాగా వాటిని తిరిగి ఎలా కొనసాగించాలో తెలియక సతమతమవుతున్నారు. ఆన్లైన్ బెట్టిం గ్, లోన్యాప్స్, రమ్మీ గేమ్స్, ఫ్రీ ఫైర్, పబ్జీ వంటి ఆన్లైన్ గేమ్స్ నిర్వహిస్తున్న చైనా, ఇతర దేశాల సైబర్ ముఠాలు, ముగ్గులోకి లా గేందుకు ముందుగా ఎంతోకొంత ఖాతాల్లో జమచేయడం, అలా జమైనవారు ఆ డబ్బును తమ అవసరాలకు ఇతరుల ఖాతాలకు పంపుతుండడంతో సంబంధం లేనివారి అకౌంట్లను సైబర్ క్రైమ్ పోలీసులు స్తంభింపజేస్తున్నారు. బాధితులు ఖాతాల నుంచి ఎక్కువ మొత్తంలో నష్టపోవద్దనే సదుద్దేశంతో ఇలా స్తంభింపజేసినా వాటిని యాక్టివేట్/అన్ఫ్రీజ్/అన్హోల్డ్ చేయడంలో మాత్రం త్వరగా స్పందించడం లేదు. ముఖ్యంగా చిరువ్యాపారులు, రైతులు, విద్యార్థులు తీవ్ర ఇబ్బందులు పడుతున్నారు.
ఏం చేయాలో ‘పాలు’పోక..
ఖమ్మం జిల్లా కలకోటకు చెందిన యువకుడు యంగల నాగరాజు పాల వ్యాపారం చేస్తుంటాడు. రెండు నెలల క్రితం పాల డబ్బులు ఇవ్వాల్సిన ఓ వ్యక్తి నుంచి అతని ఖాతాకు రూ.5వేలు జమయ్యాయి. సరిగ్గా జూన్ చివరి వారంలో డబ్బులన్నీ లెక్కచెప్పా ల్సి ఉండగా అతని అకౌంట్ ఫ్రీజ్ అయినట్టు మెసేజ్ వచ్చింది. తీరా గ్రామీణ వికాస్ బ్యాం కుకు వెళ్తే అకౌంట్ ఎందుకు ఫ్రీజ్ అయిందో మూడ్రోజుల్లో చెబుతామన్నారు. ఆ తర్వాత వెళ్తే.. సైబర్ క్రైమ్ పోలీసు స్టేషన్కు వెళ్లాలని సలహా ఇచ్చారు. ఏం జరిగిందో తెలియక పోలీసుల వద్దకు వెళ్తే వారు ఏదో సైబర్ నేరంలో అకౌంట్ ఫ్రీజ్ అయిందని రెండ్రోజుల తర్వాత చెప్పారు. అప్పటికే నాగరాజు బ్యాంకు వివరాలు పరిశీలించిన సైబర్ క్రైమ్ పోలీసులు, అతను ఎలాంటి సైబర్ నేరానికి పాల్పడలేదని గుర్తించి ఏ రాష్ర్టానికి చెందిన సైబర్ క్రైమ్ పోలీసులు తన బ్యాంకు ఖాతాను ఫ్రీజ్ చేశారో వారిని మెయిల్, ఫోన్ ద్వారా లేదా ప్రత్యక్షంగా కలవాలని వారం తర్వాత చెప్పారు. అతని అకౌంట్ ఎక్కడో పశ్చిమ బెంగాల్లోని సైబర్ క్రైమ్ పోలీసులు ఫ్రీజ్ చేసినట్టు చె ప్పారు. ఎందుకు అని సైబర్ క్రైమ్ పోలీసుల ద్వారా అడుగగా నాగరాజుకు రూ.5వేలు పం పిన వ్యక్తికి ఆ డబ్బులు ఓ ఆన్లైన్ గేమ్లో రావడం, ఆ డబ్బులకు చైనా లింక్ ఉండటంతో అతను డబ్బు ఎవరెవరికి పంపాడో వారి ఖాతాలన్నీ స్తంభింపజేశారు. ఎక్కడో మారు మూల గ్రామాల్లో పాలమ్ముకునే తాను చేసిన తప్పంటి? అని నాగరాజు వాపోతున్నాడు.
ఇతర రాష్ర్టాలకు వెళ్లలేని పరిస్థితి..
ఇలా సంబంధం లేని కేసుల్లో ఇరుక్కుంటున్న వారిలో మధ్యతరగతి వారే అధికంగా ఉన్నట్టు సైబర్ సెక్యూరిటీ పోలీసులు చెబుతున్నారు. బాధితులు ఇలాంటి సమస్యలు వారికి చెప్పుకుంటే.. ‘మీరు నిందితులు కాదని తెలుసు. కానీ మీ అకౌంట్ ఫ్రీజ్ చేసిన పోలీసులు మిమ్మలను నిందితులనే నమ్ముతున్నారు’ అని చెబుతున్నా రు. ‘నిందితుల తరఫున మీరెలా మాట్లాడతారు?’ అంటూ తమతో వాదిస్తున్నారని వాపోతున్నారు. దీంతో ఏ రాష్ర్టానికి చెంది న సైబర్ క్రైమ్ పోలీసులు అకౌంట్లను ఫ్రీజ్ చేశారో అక్కడికే వెళ్లి గోడు వెళ్లబోసుకోండని చెబుతున్నారు. ఎక్కడో మారుమూల గ్రామాల్లో పాల వ్యాపారం చేసుకునే యువకుడు తాను చేయని నేరానికి మరెక్కడో ఉన్న పశ్చిమ బెంగాల్కు వెళ్లాల్సిన దుస్థితి నెలకొన్నది. ఇలాంటి బాధితుల పట్ల కేంద్ర సైబర్ సెక్యూరిటీ విభాగం సకాలంలో నిర్ణయం తీసుకుంటేనే తాము ఏదైనా చేయగలమని రాష్ట్ర సైబర్ సెక్యూరిటీ బ్యూరో అధికారులు చెబుతున్నారు.