Facebook | హైదరాబాద్, మార్చి 30 (నమస్తే తెలంగాణ): మహబూబాబాద్కు చెందిన ఓ ప్రైవేట్ ఉద్యోగి ఫేస్బుక్ ఖాతా నుంచి ఇటీవల రోజూ అశ్లీల వీడియోలు, ఫొటోలు పోస్టవుతుండటంతో బంధుమిత్రులంతా ఆయనను తిట్టిపోస్తున్నారు. దీంతో కంగుతిన్న ఆ ఉద్యోగి చాలా కాలం నుంచి ఉపయోగించని తన ఖాతాను పరిశీలించగా.. నగ్నచిత్రాలు, అశ్లీల వీడియోలే కనిపించాయి. అప్పటికే తన అకౌంట్ పాస్వర్డ్ మారిపోయినట్టు గుర్తించిన ఆ ఉద్యోగికి రెండ్రోజుల తర్వాత ఓ ఫోన్కాల్ వచ్చింది. ఆ ఫేస్బుక్ అకౌంట్ నుంచి అశ్లీల వీడియోలు, ఫొటోలు తీసేయ్యాలంటే రూ.25 వేలు ఇవ్వాలని కాలర్లు డిమాండ్ చేశారు. దీనిపై వెంటనే సైబర్ క్రైమ్ పోలీసులను ఆశ్రయించగా.. సైబర్ క్రైమ్ పోర్టల్లో ఫిర్యాదు చేయాలని తెలిపారు. గంటలో 30 మందితో రిపోర్టు కొట్టిస్తే ఆ అకౌంట్ బ్లాక్ అవుతుందని తెలిసినవారు సూచించారు. దీంతో ఆ ఉద్యోగి దిక్కుతోచని స్థితిలో ఉన్నాడు. ఖమ్మానికి చెందిన ఓ రైతు సైతం ఇదే వ్యధను అనుభవిస్తున్నాడు.
చాలా కాలం నుంచి ఎలాంటి కార్యకలాపాలు నిర్వహించకుండా ఉన్న ఫేస్బుక్ ఖాతాలపై సైబర్ నేరగాళ్లు దృష్టిసారించి ఇలాంటి వేధింపులకు పాల్పడుతున్నట్టు తెలుస్తున్నది. ముఖ్యంగా పాత ఫోన్లోని ఫేస్బుక్ అకౌంట్ నుంచి లాగౌట్ కాకుండా కొత్త ఫోన్లోనే కొత్త అకౌంట్ క్రియేట్ చేసుకున్నవారి ఖాతాలు, టూ-ఫ్యాక్టర్ అథెంటికేషన్ ఆన్లో లేని ఖాతాలు, సంవత్సరాల తరబడి ఫేస్బుక్ డీపీలు మార్చకుండా ఉన్నవారి ఖాతాలను కేటుగాళ్లు హ్యాక్ చేయడంతోపాటు అవసరమైతే నకిలీ ఖాతాలు సృష్టించి భారీగా డబ్బులు డిమాండ్ చేస్తున్నట్టు స్పష్టమవుతున్నది. ఇలా ఇటీవల ఓ బాధితుడి ఫేస్బుక్ ఖాతాను రీ-యాక్టివేట్ చేసేందుకు ఏకంగా రూ.50 వేలు డిమాండ్ చేశారు. కానీ, సైబర్ నేరాలపై అప్పటికే ఆ బాధితుడికి కొంత అవగాహన ఉండటంతో తన ఫేస్బుక్ ఖాతా హ్యాక్ అయిందని, అందులో అశ్లీల ఫొటోలు, వీడియోలు పెడుతున్నది తాను కాదని, రిపోర్ట్ కొట్టి ఆ అకౌంట్ను బ్లాక్ చేయాలని కొత్త ఫేస్బుక్ ఖాతాలో పోస్టు చేశాడు.
సమస్యలు తొలగాలంటే..
ఫేస్బుక్ వినియోగదారులు ఎప్పటికప్పుడు ఆ యాప్ను అప్డేట్ చేయకపోవడం, దీర్ఘకాలం నుంచి ఫేస్బుక్ ఖాతాను ఉపయోగించకపోవడం, డీపీని మార్చకపోవడం, టూ-ఫ్యాక్టర్ అథెంటికేషన్ను ఆన్ చేయకపోవడం వల్లనే సైబర్ నేరగాళ్లు ఇలా రెచ్చిపోతున్నారని నిపుణులు స్పష్టం చేస్తున్నారు. బలహీనమైన పాస్వర్డ్లు పెట్టుకుంటే ఖాతాలు త్వరగా హ్యాక్ అయ్యే ప్రమాదం ఉన్నదని హెచ్చరిస్తున్నారు. వీలైనంత వరకు బలమైన పాస్వర్డ్లు పెట్టుకోవాలని, డీపీలను తరచుగా మార్చుకోవాలని చెప్తున్నారు. ఒకవేళ ఇప్పటికే మీ అకౌంట్ను కేటుగాళ్లు హ్యాక్చేసి, డబ్బులు డిమాండ్ చేస్తే వెంటనే https://cybercrime.gov.in/ వెబ్సైట్లో ఫిర్యాదు చేయాలని సూచిస్తున్నారు. బెదిరింపులకు లొంగిపోయి డబ్బులు చెల్లిస్తే సైబర్ నేరగాళ్లు మళ్లీ మళ్లీ డబ్బులు అడిగి మానసికంగా హింసిస్తారని హెచ్చరిస్తున్నారు.