కంఠేశ్వర్/మాచారెడ్డి, జూన్ 20: నిజామాబాద్ జిల్లా కేంద్రంలో గురువారం నిర్వహించిన కాంగ్రెస్ పార్టీ కార్యకర్తల విస్తృతస్థాయి సమావేశంలో తరచూ కరెంట్ సరఫరాలో అంతరాయం ఏర్పడింది. ఎమ్మెల్యేలు సుదర్శన్రెడ్డి, భూపతిరెడ్డి, ఎమ్మెల్సీ జీవన్రెడ్డి, పార్టీ నేతలు షబ్బీర్అలీ తదితరులు పాల్గొన్న ఈ సమావేశంలో తరచూ కరెంట్ పోవడంతో నాయకులు, కార్యకర్తలు విసుగుచెందారు. షబ్బీర్ అలీ మాట్లాడుతుండగా రెండుసార్లు కరెంట్ పోయింది. ఇచ్చిన హామీలకు కట్టుబడి ఉన్నామని, బోధన్ షుగర్ ఫ్యాక్టరీని తెరిపిస్తామని ఎమ్మెల్సీ జీవన్రెడ్డి తెలిపారు.
పదెకరాల లోపు వారికే రైతుబంధు!
పదెకరాల లోపు భూమి ఉన్న వారికి, అది కూడా సాగు చేస్తున్న రైతులకు మాత్రమే రైతుభరోసా అందించాలని మాచారెడ్డి మండల పరిషత్ సర్వసభ్య సమావేశం తీర్మానించింది. ప్రభుత్వ సలహాదారు షబ్బీర్ అలీ సమక్షంలో చేసిన ఈ తీర్మానం చర్చనీయాంశమైంది. మాచారెడ్డి మండల పరిషత్ సర్వసభ్య సమావేశం ఎంపీపీ నర్సింగ్రావు అధ్యక్షతన గురువారం జరిగింది.
ముఖ్యఅతిథిగా షబ్బీర్అలీ హాజరుకాగా, రైతుభరోసాను పదెకరాల లోపు రైతులకే పరిమితం చేయాలని, అది కూడా పంటలు పండించే వారికే ఇవ్వాలని తీర్మానం చేశారు. తీర్మాన ప్రతిని షబ్బీర్అలీకి అందజేశారు. ఈ సందర్భంగా ఆయన మాట్లాడుతూ.. రైతుభరోసాపై రాష్ట్రంలోనే మొదటిసారి ఈ విధంగా ఏకగ్రీవంగా తీర్మానం చేసిన మండల పరిషత్ సభ్యులకు ధన్యవాదాలు తెలిపారు.