హైదరాబాద్, మే 17 (నమస్తే తెలంగాణ): కల్లాల్లో, ఇండ్ల వద్ద మిగిలిన ధాన్యాన్ని సేకరించేలా వెంటనే చర్యలు చేపట్టాలని ప్రభుత్వ ప్రధాన కార్యదర్శి శాంతికుమారి కలెక్టర్లను ఆదేశించారు. కొనుగోలు కేంద్రాల నుంచి మిల్లులకు వేగంగా ధాన్యాన్ని తరలించేందుకు చర్యలు తీసుకోవాలని సూచించారు. తడిసిన ధాన్యాన్ని ఆరబెట్టడానికి కొందరు కలెక్టర్లు తీసుకున్న చర్యలను సీఎస్ అభినందించారు.
ఇదే విధానాన్ని మిగతా కలెక్టర్లు అనుకరించాలని ఆదేశించారు. ధాన్యం కొనుగోళ్లు, అమ్మ ఆదర్శ పాఠశాలల పనుల పురోగతిపై శుక్రవారం సచివాలయం నుంచి కలెక్టర్లతో ఆమె వీడియో కాన్ఫరెన్స్ నిర్వహించారు. అమ్మ ఆదర్శ పాఠశాల పనుల పురోగతిని పూర్తిచేసిన కలెక్టర్లను అభినందించారు.
జూన్ 12లోగా ప్రతి విద్యార్థికి నోట్బుక్లు, పాఠ్యపుస్తకాలు, ఒక జత సూల్ యూనిఫాం అందేలా చర్యలు తీసుకోవాలని ఆదేశించారు. మరమ్మతులు, విద్యుద్దీకరణ, మరుగుదొడ్లు, తాగునీరు, పెయింటింగ్, ఫర్నీచర్ పనులు చేపట్టాలని ఆదేశించారు. కాన్ఫరెన్స్లో విద్యాశాఖ ముఖ్య కార్యదర్శి బీ వెంకటేశం, పంచాయతీరాజ్శాఖ ముఖ్య కార్యదర్శి సందీప్కుమార్ సుల్తానియా, రెవెన్యూశాఖ ముఖ్య కార్యదర్శి నవీన్మిట్టల్, పౌర సరఫరాలశాఖ కమిషనర్ డీఎస్ చౌహాన్, మున్సిపల్శాఖ డైరెక్టర్ దివ్య, పంచాయతీరాజ్శాఖ కమిషనర్ అనితా రామచంద్రన్ పాల్గొన్నారు.