Heavy Rains | రాష్ట్రంలో మరో మూడు రోజుల పాటు వర్షాలు కురిసే అవకాశం ఉందని వాతావరణ శాఖ హెచ్చరించిన నేపథ్యంలో కలెక్టర్లు అప్రమత్తంగా ఉండాలని ప్రభుత్వ ప్రధాన కార్యదర్శి శాంతికుమారి ఆదేశించారు. గతవారం రోజులుగా విస్తారంగా కురుస్తున్న వర్షాలపై సీఎం సమీక్షిస్తున్నారని.. జిల్లాల్లో ప్రాణ, ఆస్తినష్టం జరుగకుండా చర్యలు చేపట్టాలని ఆమె సూచించారు. ముందుగానే పునరావాస కేంద్రాల ఏర్పాటుపై చర్యలు తీసుకోవాలన్నారు. పోలీస్, ఇరిగేషన్, పంచాయతీరాజ్, అగ్నిమాపక శాఖ, ఎన్డీఆర్ఎఫ్, ఎస్డీఆర్ఎఫ్ శాఖలు సమన్వయంతో పని చేయాలని కలెక్టర్లకు సూచించారు. డీజీపీ జితేందర్, ప్రణాళికా శాఖ ముఖ్య కార్యదర్శి సందీప్ కుమార్ సుల్తానియా టెలీకాన్ఫరెన్స్లో పాల్గొన్నారు. వర్షాలకు చెరువులు కుంటలు నిండాయని.. తెగకుండా ముందుజాగ్రత్త చర్యలు తీసుకోవాలన్నారు.
ముందుజాగ్రత్తగా భద్రాద్రి కొత్తగూడెం, ములుగు జిల్లాల్లో ఎన్డీఆర్ఎఫ్ టీంలను ఏర్పాటు చేయడం జరిగిందన్నారు. అన్ని జిల్లాల్లో ప్రత్యేకంగా కంట్రోల్ రూమ్లను ఏర్పాటు చేసుకోవాలన్నారు. ఏదైనా అత్యవసర సహాయం కావాలన్నా సంప్రదించాలని సీఎస్ సూచించారు. పారే వాగులను ఎవరూ దాటకుండా ఆయా ప్రాంతాలలో తగు బందోబస్తు ఏర్పాటు చేయాలని చెప్పారు. డీజీపీ జితేందర్ మాట్లాడుతూ రాష్ట్రంలోని అందరు పోలీస్ కమిషనర్లు, ఎస్పీలు, కలెక్టర్లతో పాటు ఇతర అధికారులతో సమన్వయం చేస్తూ పని చేస్తున్నారన్నారు. ఇప్పటివరకు అవాంఛనీయ సంఘటనలు జరుగలేదని, పోలీస్ అధికారులందరూ క్షేత్రస్థాయిలో పర్యవేక్షిస్తున్నారన్నారు.
ప్రణాళికాశాఖ ముఖ్య కార్యదర్శి సందీప్ సుల్తానియా మాట్లాడుతూ రాష్ట్రంలోని పలు జిల్లాల్లో మరో మూడు రోజుల పాటు మోస్తరు నుంచి భారీ వర్షాలు కురిసే అవకాశం ఉందని తెలిపారు. భద్రాచలం వద్ద ఇప్పటికే రెండవ ప్రమాద హెచ్చరికను జారీ చేశామని.. 53 అడుగులకు చేరితే మూడో ప్రమాద హెచ్చరికను జారీ చేయనున్నట్లు భద్రాద్రి కొత్తగూడెం కలెక్టర్ చెప్పారు. ఇప్పటికే జిల్లాల్లో దెబ్బతిన్న నివాస గృహాలు, ఇతర నష్టాలపై ప్రభుత్వానికి ప్రాథమిక నివేదిక సమర్పిస్తున్నామని తెలిపారు. ములుగు జిల్లా కలెక్టర్ మాట్లాడుతూ దాదాపు వంద కిలోమీటర్ల విస్తీర్ణంలో ములుగు జిల్లాలో గోదావరి పరీవాహక ప్రాంతం ఉందని, 77 గ్రామాలను సమస్యాత్మక గ్రామాలుగా గుర్తించి ముందస్తు జాగ్రత్తలను చేపట్టామని చెప్పారు. అధికారులంతా క్షేత్రస్థాయిలోనే ఉండి పరిస్థితులకు అనుగుణంగా తక్షణ చర్యలు చేపట్టాలని, వీలైనంత వేగంగా స్పందించాలని సీఎస్ అధికారులను ఆదేశించారు.