హైదరాబాద్, ఏప్రిల్ 21(నమస్తే తెలంగాణ): అకాల వర్షాలతో మరో 920 ఎకరాల్లో పంటనష్టం జరిగినట్టు ప్రాథమిక అంచనా ఉన్నదని వ్యవసాయ శాఖ మంత్రి తుమ్మల నాగేశ్వరరావు వెల్లడించారు. ఇప్పటికే 2,200 ఎకరాల్లో నష్టం జరిగినట్టు నిర్ధారించామని, ఇప్పుడు రంగారెడ్డి, జనగాం, నిర్మల్ జిల్లాల్లో మరో 920 ఎకరాల్లో నష్టం జరిగినట్టు అంచనా ఉందని తెలిపారు. ఇప్పటివరకు 3,120 ఎకరాల్లో పంటనష్టం జరిగినట్టు తెలిపారు.
ఇప్పటికే మార్చి నెలలో కురిసిన వడగండ్ల వానలతో జరిగిన పంటనష్టానికి పరిహారం విడుదల చేసేందుకు రాష్ట్ర ఎన్నికల సంఘం అనుమతి కొరకు విజ్ఞప్తి చేసినట్టు తెలిపారు. దీనికి తోడు ఇప్పటి నష్టాన్ని కూడా లెక్కగట్టి నివేదిక సమర్పించాలని అధికారులను ఆదేశించారు. ఈసీ అనుమతి రాగానే నష్టపరిహారం అందించేందుకు ప్రభుత్వం సిద్ధంగా ఉందన్నారు. వానకాలానికి ముందు సరఫరా చేసే పచ్చిరొట్టె విత్తనాల సేకరణకు టెండర్ల ప్రక్రియను నిర్వహించుటకు అనుమతి ఇచ్చిన రాష్ట్ర ఎన్నికల సంఘానికి ఆయన కృతజ్ఞతలు తెలిపారు.