హైదరాబాద్ సిటీబ్యూరో, ఏప్రిల్ 22 (నమస్తే తెలంగాణ): విపత్తులతోపాటు వాతావరణ మార్పులు, తెగుళ్ల వల్ల పంటలకు వాటిల్లిన నష్టాన్ని హైరిజల్యూషన్ కెమెరాలతో కూడిన డ్రోన్ల సాయంతో అత్యంత కచ్చితంగా, వేగం గా అంచనా వేసేందుకు ఇక్రిశాట్, ఆసియా అభివృద్ధి బ్యాంకు (ఏడీబీ), వ్యవసాయ విస్తరణ విభాగం కలిసి నూతన విధానాన్ని అభివృద్ధి చేశాయి. దీన్ని బంగ్లాదేశ్లో ప్రయోగాత్మకంగా పరీక్షించామని, అత్యాధునిక సాంకేతికతతో కూడిన ఈ విధానంతో పంట నష్టాన్ని నూటికి నూరు శాతం శాస్త్రీయంగా అంచనా వేయవచ్చని ఇక్రిశాట్ వర్గాలు వెల్లడించాయి. ప్రపంచవ్యాప్తంగా ఇప్పటికే వివిధ రంగాల్లో డ్రోన్లను విరివిగా ఉపయోగిస్తున్నారు.వ్యవసాయంలోనూ క్రమంగా డ్రోన్లవినియోగం పెరుగుతున్నది. ప్రస్తుతం పొలాల్లో ఎరువులు, పురుగుమందులను చల్లేందుకు ఉపయోగిస్తున్న డ్రోన్ల సాయంతో ఇకపై పంట నష్టాన్నీ అంచనా వేయనున్నారు.