హైదరాబాద్ : తెలంగాణ అభివృద్ధికి నిధులు తీసుకువచ్చే దమ్ములేక బీజేపీ నేతలు విమర్శలు చేస్తున్నారని తెలంగాణ ఫుడ్స్ చైర్మన్ మేడే రాజీవ్ సాగర్ (Rajeev Sagar ) బీజేపీ నాయకులపై మండి పడ్డారు. రైతు వ్యతిరేక(Anti Farmers) విధానాలకు పాల్పడుతున్న ఆ పార్టీకి ప్రజలు బుద్ధి చెప్పే రోజులు దగ్గర్లోనే ఉన్నాయని అన్నారు. తెలంగాణలో అమలు అవుతున్న రైతు పథకాలను మోదీ (Narendera Modi) సర్కార్ కాపీ కొడుతుందని విమర్శించారు.
బీఆర్ఎస్ (BRS) పార్టీని తిట్టడంలో పోటీ పడుతున్న బీజేపీ నేతలు కేంద్రం నుంచి నిధులు తీసుకురావడంలో ఎందుకు పోటి పడడం లేదని ప్రశ్నించారు. అసలు రైతులకు బీజేపీ (BJP) పార్టీ ఏం చేసిందని ఖమ్మంలో రైతు సభ పెట్టారని ఆరోపించారు. రైతులకు బీజేపీ చేసిన మేలు ఏమి లేకపోవడంతో అమిత్ షా (Amit Shah) కేసీఆర్ పై అసత్య ప్రచారం చేశారని మండిపడ్డారు.
దేశంలో ఎక్కడ లేని విధంగా రైతుబీమా రాష్ట్రంలో అమలవుతుందని తెలిపారు. తెలంగాణ రైతులకు పెట్టుబడి సాయం అందించేందుకు రైతుబంధు పథకానికి శ్రీకారం చుడితే దీనినే ఆదర్శంగా తీసుకుని కేంద్రంలో కిసాన్ సమ్మాన్ యోజన పథకం తీసుకువచ్చింది నిజం కాదా అని ప్రశ్నించారు. రైతు వ్యతిరేక బిల్లులు తీసుకురావాలని చూసిన నీచమైన చరిత్ర బిజేపీ పార్టీదని విమర్శించారు.