వరంగల్ : గంజాయి, కొకైన్ లాంటి మత్తు పదార్థాలను( Drugs) సేవించి యువత తమ భవిష్యత్తును అంధకారం చేసుకోవద్దని వరంగల్ పోలీస్ కమిషనర్ అంబర్ కిషోర్ ఝా(Amber Kishore Jha) విద్యార్థులకు సూచించారు. గంజాయి ఇతర మత్తు పదార్థాల వినియోగం పట్ల కలిగే నష్టాలపై మామూనూర్ పోలీసుల అధ్వర్యంలో బొల్లికుంటలో గల వాగ్దేవి ఇంజినీరింగ్ కళాశాలలో విద్యార్థులకు అవగాహన సదస్సు ఏర్పాటు చేశారు. ఈ కార్యక్రమానికి వరంగల్ పోలీస్ కమిషనర్ ముఖ్య అథిదిగా హాజరై మాట్లాడారు. మత్తు పదార్థాల వినియోగం ద్వారా నేడు యువత భవిష్యత్తు ప్రమాదంలో ఉందన్నారు.
ఈ ప్రమాదం బారిన పడకుండా యువత అప్రమత్తంగా ఉండాలని సూచించారు. కేవలం క్షణికానందం కోసం మత్తు పదార్థాల సేవించడం ద్వారా మీరు అనుకున్న లక్ష్యాలను సాధించడం ఓ కలగానే మిగిలి పోతుందని హెచ్చరించారు. కొంత మంది వ్యక్తులు తమ డబ్బు సంపాదన కోసం గంజాయి లాంటి మత్తు పదార్థాల విక్రయాలకు పాల్పడి యువతకు అందిస్తున్నారు. ఇలాంటి స్వార్థపరుల చేతుల్లో యువత బలికావద్దని కోరారు. యువత లక్ష్యాన్ని ఏర్పరుచుకొని అందుకు అనుగుణంగా శ్రమించాలన్నారు.