నిజామాబాద్: నిజామాబాద్ (Nizamabad) జిల్లా పొతంగల్లో విషాదం చోటుచేసుకున్నది. బంధువులు తమపై దుష్ప్రచారం చేస్తున్నారని మనస్తాపం చెందిన నవ దంపతులు రైలు కిందపడి ఆత్మహత్య చేసుకున్నారు. తమ సూసైడ్కు గల కారణాన్ని వివరిస్తూ వీడియో తీసి పోలీసులకు పంపించారు. వారిని కాపాడేందుకు పోలీసులు ప్రయత్నించినప్పటికీ లాభం లేకుండా పోయింది. జిల్లాలోని పొతంగల్ మండలం హెగ్డోలికి చెందిన అనిల్, శైలజ దంపతులకు ఏడాది క్రితం వివాహం జరిగింది. కుటుంబంతో కలిసి సొంతూరిలోనే ఉంటున్నారు. అయితే సోమవారం ఉదయం ఓ ఇంటర్వ్యూకు వెళ్తున్నామని చెప్పి బయటకు వచ్చారు. అనంతరం తాను ఓ తప్పు చేశానని, దాన్ని భర్త, అత్తామామలు క్షమించినా బంధువులు తమపై దుష్ప్రచారం చేస్తుండటాన్ని తట్టుకోలేక ఇద్దరం గోదావరిలో దూకి ఆత్మహత్యకు పాల్పడుతున్నట్లు శైలజ ఓ వీడియో తీసి కోటగిరి ఎస్ఐ సందీప్కు పంపారు.
మా పిన్ని వల్లే తాము చనిపోతున్నామని శైలజ ఆ వీడియోలో పేర్కొన్నారు. గతంలో నేను ఓ తప్పు చేశానని, దానిని క్షమించిన నా భర్త, అత్తామామలు, ఏనాడూ ఎవరితోనూ ఆ విషయం గురించి చెప్పలేదు. కానీ మా పిన్ని ఈ విషయాన్ని మా బంధువుల్లో చాలా మందికి చెప్పింది. ఎవరికీ చెప్పొద్దని మేం కోరినప్పటికీ బంధువులతోపాటు ఇతరులకూ చెబుతున్నది. ఆమె చెప్పిన మాటలు విన్న బంధువులు ఇష్టంవచ్చినట్లు మాట్లాడుతుండటంతో ఇటీవలే నా భర్త పురుగుల మందు తాగాడు. అయినా ఈ దుష్ప్రచారం ఆగడం లేదు. అందుకే మేం చనిపోతున్నాం. నా చావుకు కారణం మా పిన్ని అంటూ అందులో తెలిపింది.
ఈ వీడియోపై వెంటనే స్పందించిన కోటగిరి ఎస్ఐ సందీప్.. వీడియోతోపాటు సెల్ఫోన్ నంబర్ను నవీపేట ఎస్ఐకి పంపించారు. దంపతులు ఆత్మహత్య చేసుకునేందుకు గోదావరి వద్దకు వస్తున్నట్లు సమాచారం అందుకున్న స్థానిక పోలీసులు బాసర వంతెన దగ్గరకు వెళ్లి గాలించారు. అయితే అక్కడ కనిపించకపోవడంతో.. బాధితుల ఫోన్ నంబరును ట్రాక్చేశారు. దీంతో వారిద్దరు ఫకీరాబాద్-మిట్టాపూర్ మధ్య ఉన్నట్లు గుర్తించారు. వెంటనే అక్కడికి వెళ్లి గాలించగా ఇద్దరి మృతదేహాలు రైల్వే పట్టాలపై కనిపించాయి.
మా చావుకు పిన్నే కారణమని సెల్ఫీ వీడియో చేసి దంపతుల సూసైడ్
నిజామాబాద్ – పోతంగల్ మండలం హెగ్డోలికి చెందిన అనిల్(28), శైలజ(24)కు ఏడాది కిందట పెళ్లైంది. అయితే ఆ దంపతులు రైలు కిందపడి ఆత్మహత్య చేసుకున్నారు
కాగా వారు చనిపోయేముందు పోలీసులకు సెల్ఫీ వీడియో పంపారు.. తన పిన్ని చేసిన… pic.twitter.com/4uIazuUa1k
— Telugu Scribe (@TeluguScribe) July 16, 2024