హైదరాబాద్, జూన్ 11(నమస్తే తెలంగాణ): ఒకే రకం విత్తనం కోసం రైతులు డిమాండ్ చేయొద్దని వ్యవసాయ శాఖ మంత్రి తుమ్మల నాగేశ్వరరావు రైతులకు సూచించారు. సరైన యాజమాన్య పద్ధతులు పాటిస్తే అన్ని రకాల విత్తనాలు ఒకే రకమైన దిగుబడి ఇస్తాయని తెలిపారు. రైతు వేదికల్లో రైతునేస్తం కార్యక్రమం ద్వారా ఇప్పటి వరకు 38,794 మంది రైతులకు శిక్షణ ఇచ్చినట్టు తెలిపారు. మంగళవారం రైతునేస్తం కార్యక్రమంలో పాల్గొన్న ఆయన మాట్లాడుతూ… రైతులకు అధిక సాంద్రత పత్తి సాగుపై అవగాహన కల్పించినట్టు తెలిపారు. రాష్ట్రంలో అవసరమైన మేరకు పత్తి విత్తనం అందుబాటులో ఉందని, అన్ని పత్తి రకాలు సరైన యాజమాన్య పద్ధతులు పాటిస్తే ఒకే రకమైన దిగుబడిని ఇస్తాయని తెలిపారు. ఈ కార్యక్రమంలో పద్మశ్రీ చింతల వెంకట్రెడ్డి హాజరయ్యారు.