Ramagundam | కోల్సిటీ, జూలై 21: ‘ప్రజా పాలన అంటే ఇదేనా? నగర పాలక సంస్థ మేయర్ ఆచూకీ తెలిస్తే జర చెప్పండి.. కార్పొరేషన్లో అవినీతిని ప్రశ్నించినందుకు మా డివిజన్లో అభివృద్ధిని అడ్డుకుంటారా? ప్రజాప్రతినిధికే విలువ లేని ఈ పాలనలో ప్రజలకు విలువ ఇస్తారా?’ అంటూ పెద్దపల్లి జిల్లా రామగుండం 25వ డివిజన్ మహిళా కార్పొరేటర్ నగునూరి సుమలత రాజు ఆగ్రహం వ్యక్తంచేశారు. మేయర్, అధికారుల తీరును నిరసిస్తూ ఆదివారం రామగుండంలో బురద నీటిలో బైఠాయించి నిరసన తెలిపారు. వర్షాన్ని సైతం లెక్కచేయక నడి రోడ్డుపై వరద నీటిలో కూర్చుని నినదించారు. తమ డివిజన్ పరిధిలో అభివృద్ధికి ఉద్దేశపూరితంగా నిధులు కేటాయించడం లేదని ఆరోపించారు.
రెండేండ్ల క్రితం డివిజన్లోని పద్మావతి కాలనీలో రోడ్డు నిర్మాణం కోసం టెండర్ పిలిచారని, ఆ పనులు ప్రారంభించి మొదట్లోనే నిలిపివేశారని అన్నారు. ‘ఇదేమిటని అడిగితే.. మీ డివిజన్లో రోడ్డు వేయొద్దని ఆదేశాలు వచ్చాయి’ అని అధికారులు చెబుతున్నారని పేర్కొన్నారు. దీనితో డివిజన్లో గుంతల రోడ్డు వల్ల తరచూ ప్రమాదాలు జరుగుతున్నాయనీ, కార్పొరేషన్కు ఈ డివిజన్ నుంచే అత్యధికంగా ఎల్ఆర్ఎస్ నిధులు వస్తున్నా అధికారులు కావాలనే నిధులు ఇవ్వడం లేదని మండిపడ్డారు. తమ డివిజన్లో అభివృద్ధి పనులు చేపట్టకపోతే కలెక్టరేట్ను ముట్టడిస్తామని హెచ్చరించారు.