హైదరాబాద్, మే 14 (నమస్తే తెలంగాణ): లోక్సభ ఎన్నికల్లో కాంగ్రెస్ పార్టీ 13 స్థానాలు గెలుచుకుంటుందని ముఖ్యమంత్రి రేవంత్రెడ్డి జోస్యం చెప్పారు. జూబ్లీహిల్స్లోని తన నివాసంలో మంగళవారం మీడియాతో నిర్వహించిన చిట్చాట్లో ఆయన మాట్లాడుతూ.. సోమవారం జరిగిన ఎన్నికల సరళినిబట్టి కాంగ్రెస్ పార్టీ తక్కువలో తక్కువగా 9 సీట్లు గెలుస్తుందని, ఫలితాలు ఇంకా మెరుగ్గా ఉంటే 13 సీట్లు గెలుచుకుంటుందని ఆశాభావం వ్యక్తంచేశారు.
కంటోన్మెంట్ ఎన్నికల్లో తమదే విజయమన్న ఆయన.. అక్కడ 20 వేల వరకు మెజారిటీ సాధించబోతున్నట్టు చెప్పారు. కేంద్రంలో బీజేపీకి ఈసారి 210 సీట్లు కూడా దాటే పరిస్థితి లేదని తేల్చి చెప్పారు. రాష్ట్రంలో బీఆర్ఎస్కు ఆరేడు స్థానాల్లో డిపాజిట్ కూడా రాదని పేర్కొన్నారు. కాంగ్రెస్పై కోపంతో ఆ పార్టీ పూర్తిగా బీజేపీకి సపోర్ట్ చేసిందని రేవంత్రెడ్డి ఆరోపించారు.