సిరిసిల్ల టౌన్, జూన్ 11: అప్పుగా తీసుకున్న డబ్బు తిరిగి చెల్లించలేదని సిరిసిల్లకు చెందిన ఓ వ్యక్తిని బంధించి.. విచక్షణారహితంగా దాడిచేసిన ఘటన ఆలస్యంగా వెలుగులోకి వచ్చింది. రాజన్న సిరిసిల్ల జిల్లా కేంద్రంలోని ప్రెస్క్లబ్లో మంగళవారం ఏర్పాటుచేసిన సమావేశంలో బాధితుడు గుండెల్లి రాజ్కుమార్ తన గోడును మీడియా ముందు వెళ్లబోసుకున్నాడు.
కొద్దినెలల క్రితం అవసరం నిమిత్తం పట్టణానికి చెందిన నరేశ్ వద్ద రూ.8 లక్షలు అప్పుగా తీసుకున్నట్టు రాజ్కుమార్ తెలిపాడు. తిరిగి చెల్లించడంలో ఆలస్యం కావడంతో నరేశ్ పట్టణానికి చెందిన కాంగ్రెస్ నేతతో కలిసి సోమవారం తన ఇంటికి వచ్చాడని తెలిపాడు. అప్పు విషయం మాట్లాడుదామని బండిపై కాంగ్రెస్ నేతకు చెందిన గోదాము వద్దకు తనను తీసుకెళ్లినట్టు చెప్పారు.
అక్కడికి చేరుకోగానే ఎనిమిది మంది తనను చెట్టుకు కట్టేసి ఇష్టారీతిన దాడి చేశారని ఆరోపించాడు. వెంటనే అప్పు చెల్లించాలని, లేకుంటే ఇక్కడే చంపేస్తామని బెదిరించారని వాపోయాడు. దాడి ఘటన గురించి ఎవరికి చెప్పినా ప్రాణాలతో ఉండవంటూ బెదిరించారని చెప్పాడు. పోలీసులు వెంటనే కాంగ్రెస్ నాయకుడితోపాటు నరేశ్ను అరెస్ట్ చేసి తనకు ప్రాణరక్షణ కల్పించాలని రాజ్కుమార్ ఈ సందర్భంగా విజ్ఞప్తి చేశాడు.