Sangareddy | సంగారెడ్డి, జూలై 4 (నమస్తే తెలంగాణ) : సంగారెడ్డి జడ్పీ సమావేశం వేదికపై కాంగ్రెస్ యువ నాయకుడు ఆసీనుడు కావడం చర్చనీయాంశంగా మారింది. సంగారెడ్డి జడ్పీ చైర్పర్సన్ మంజుశ్రీజైపాల్రెడ్డి అధ్యక్షతన జడ్పీ చివరి సర్వసభ్య సమావేశం జరిగింది. వైద్యారోగ్య శాఖ మంత్రి దామోదర రాజనర్సింహ హాజరయ్యారు.
బీఆర్ఎస్ పాలనలో జడ్పీ సర్వసభ్య సమావేశంలో ఎంపీలు, ఎమ్మెల్యేలు వేదికపైనే ఆసీనులయ్యేవారు. కాగా, గురువారం జరిగిన జడ్పీ సమావేశంలో మాత్రం మంత్రి రాజనర్సింహ, జడ్పీ చైర్పర్సన్ మంజుశ్రీజైపాల్రెడ్డి, కలెక్టర్ క్రాంతి, అదనపు కలెక్టర్, సీఈవో వేదికపై కూర్చున్నారు. ఎంపీలు రఘునందన్రావు, సురేశ్ షెట్కార్, ఎమ్మెల్యేలు చింతా ప్రభాకర్, సునీతారెడ్డి, మాణిక్రావు, సంజీవరెడ్డి, ఎమ్మెల్సీ యాదవరెడ్డి వేదిక దిగువన కూర్చోగా.. అందోల్ నియోజకవర్గానికి చెందిన కాంగ్రెస్ నాయకుడు వినయ్గౌడ్ వేదికపైనే మంత్రి వెనక కుర్చీలో కూర్చున్నాడు.
జడ్పీ వేదికపై కూర్చునేందుకు ఎంపీ, ఎమ్మెల్యేలను అవకాశం ఇవ్వని అధికారులు, కాంగ్రెస్ నాయకుడు కూర్చుంటే మాత్రం నోరు మెదపలేదు. వినయ్గౌడ్ సమావేశం ముగిసేంత వరకు వేదికపైనే కూర్చుని మంత్రి వ్యక్తిగత, సెక్యూరిటీ సిబ్బందితో మాట్లాడుతూ గడిపాడు. సమావేశంలోకి కాంగ్రెస్ నాయకుడిని అనుమతించడం, వేదికపై కూర్చున్నా అధికారులు మిన్నుకుండి పోవడం చర్చనీయాంశమైంది.