హైదరాబాద్: కాంగ్రెస్ సీనియర్ నేత, ఎమ్మెల్సీ జీవన్ రెడ్డి (MLC Jeevan Reddy) తన పదవికి రాజీనామా చేయనున్నారు. మధ్యాహ్నం అసెంబ్లీ సెక్రటరీకి తన రాజీనామా లేఖ అందజేయనున్నారు. జగిత్యాల ఎమ్మెల్యే సంజయ్ కుమార్ను పార్టీలో చేర్చుకోవడంపై ఆయన కినుకవహించారు. తనకు కనీసం సమాచారం ఇవ్వకుండా తన నియోజకవర్గానికి చెందిన ఎమ్మెల్యేను చేర్చుకోవడంతో ఆయన పార్టీపై ఆగ్రహంగా ఉన్నారు. మంత్రులు, పార్టీ నాయకులు ఆయనను బుజ్జగించడానికి ప్రయత్నించినప్పటికీ శాంతించలేదు. ఈ క్రమంలో జగిత్యాల నుంచి హైదరాబాద్ చేరుకున్న ఆయన మరికాసేపట్లో అసెంబ్లీకి వెళ్లనున్నారు.
ఎమ్మెల్సీ పదవికి రాజీనామా చేస్తున్నట్లు చెప్పారు. ప్రస్తుతానికి పార్టీ మారే ఆలోచన తనకు లేదని చెప్పారు. బీజేపీతోపాటు మరే పార్టీ తనను సంప్రదించలేదన్నారు. రాష్ట్ర కాంగ్రెస్ వ్యవహారాల ఇన్చార్జి మున్షి సహా భట్టి విక్రమార్క, శ్రీధర్భాబు మాట్లాడారని తెలిపారు. ఎమ్మెల్సీ పదవికి రాజీనామా చేసి పల్లెలన్నీ తిరుగుతానని చెప్పారు. ప్రజల అభిప్రాయం మేరకు నిర్ణయం తీసుకుంటానని వెల్లడించారు. ప్రస్తుతం రాజకీయాల్లో చివరి దశలో ఉన్నానని, ఈ స్టేజ్లో పార్టీ నుంచి గౌరవం కోరుకున్నానని, కానీ నేడు అది తనకు దక్కలేదని వెల్లడించారు. ఇన్నేండ్లు పార్టీ ప్రతీ నిర్ణయాన్ని పాటించానని, తనకు ఇష్టం లేకపోయినా పార్టీ చెప్పిన చోట పోటీచేశానన్నారు.
జీవన్ రెడ్డిని బుజ్జగించేందుకు మంత్రి శ్రీధర్ బాబుతోపాటు ఇతర నేతలు సోమవారం నుంచి యత్నిస్తున్నారు. అయితే ఆయన పట్టువీడటంలేదు. తనతోపాటు పార్టీ శ్రేణులకు ఎలాంటి సమాచారం ఇవ్వకుండానే డాక్టర్ సంజయ్ను పార్టీలో చేర్చుకోవడపై తీవ్ర ఆగ్రహంగా ఉన్నారు. విషయం తెలుసుకున్న పార్టీ శ్రేణులు, అభిమానులు సోమవారం ఉదయమే పెద్ద సంఖ్యలో జీవన్రెడ్డిని ఆయన ఇంటివద్ద కలిసి ఆందోళన వ్యక్తంచేశారు. సీఎం రేవంత్రెడ్డి తీరుపై ఆగ్రహం వ్యక్తంచేశారు. తనకు మాటమాత్రమైనా చెప్పకుండా, తన అనుభవానికి కనీస విలువ ఇవ్వకుండా సీఎం వ్యవహరించారంటూ జీవన్రెడ్డి బాహాటంగానే తన అసంతృప్తిని వ్యక్తంచేశారు. ఎమ్మెల్సీ పదవికి రాజీనామా చేస్తానని ప్రకటించడంతో వాతావరణం ఒక్కసారిగా వేడెక్కింది.