Telangana Budget | హైదరాబాద్, జూలై 25 (నమస్తే తెలంగాణ): రాష్ట్రంలో విద్యాభివృద్ధికి కాంగ్రెస్ ప్రభుత్వం మొండి చేయి ఇచ్చింది. రాష్ట్ర బడ్జెట్లో కేవలం 7.3 శాతం నిధులే కేటాయించి నిరుత్సాహపరిచింది. రాష్ట్ర మొత్తం బడ్జెట్ 2,91,159 కోట్లు కాగా, విద్య కోసం రూ.21,281 కోట్లు మాత్రమే కేటాయించి చేతులు దులుపుకున్నది. పాఠశాల విద్యకు రూ.17,930 కోట్లు బడ్జెట్లో ప్రతిపాదించారు. అందులో ప్రగతి పద్దు కోసం కేవలం రూ.3,001 కోట్లు చూపించారు. పాఠశాల విద్యాశాఖలో బోధన, బోధనేతర సిబ్బంది కోసం రూ.14,930 కోట్లు కేటాయించినట్లు పేర్కొన్నారు.
మొత్తం నిధుల్లో జీతభత్యాలు రోజువారీ ఖర్చులు తదితరాల కోసం రూ.17,648 కోట్లు కేటాయించగా, స్కూళ్లు, కాలేజీలు, యూనివర్సిటీల అభివృద్ధి, మౌలిక సదుపాయాల వంటి వాటి కోసం కేవలం రూ.3,632 కోట్లు కేటాయించారు. కేసీఆర్ హయాంలో విద్య కోసం మొత్తం బడ్జెట్లో 10 శాతానికి పైగా నిధులు కేటాయించిన సందర్భాలు ఉన్నాయి. సాంకేతిక విద్యకు బడ్జెట్ కేటాయింపు పరిస్థితి మరీ దారుణంగా ఉన్నది. జీతభత్యాలు వంటి కోసం నిర్వహణ పద్దు కింద రూ.476 కోట్లు కేటాయించగా అభివృద్ధి కోసం నిధుల కేటాయింపులే లేవు. వివిధ అభివృద్ధి పనుల కోసం కేవలం రూ.14 కోట్లతో సరిపెట్టారు.
రాష్ట్రంలోని యూనివర్సిటీల అభివృద్ధికి రాష్ట్ర ప్రభుత్వం బడ్జెట్లో అరకొర నిధులే కేటాయించింది. ఉస్మానియా యూనివర్సిటీకి కేవలం రూ.492 కోట్ల నిధులనే కేటాయించింది. కాకతీయ యూనివర్సిటీకి వేతనాలు, గ్రాంట్ల కోసం రూ.134 కోట్లను బడ్జెట్లో ప్రతిపాదించారు. డాక్టర్ బీఆర్ అంబేద్కర్ ఓపెన్ వర్సిటీకి రూ.17 కోట్లు, పొట్టి శ్రీరాములు వర్సిటీకి రూ.43 కోట్లు, తెలంగాణ వర్సిటీకీ రూ.42 కోట్లు, మహాత్మాగాంధీ వర్సిటీకి రూ.30 కోట్లు, శాతవాహన వర్సిటీకి రూ.14 కోట్లు, పాలమూరు వర్సిటీకి రూ.11 కోట్ల చొప్పున మొత్తం రూ.787 కోట్ల నిధులును కేటాయించారు. సాంకేతిక యూనివర్సిటీలైన జేఎన్టీయూకు రూ.52 కోట్లు, ఆర్జీయూకేటీ వర్సిటికీ రూ.35 కోట్లు, జేఎన్టీయూ ఎఫ్ఏకి రూ.28.75 కోట్లు కలిపి మొత్తం రూ.133 కోట్లను రాష్ట్ర ప్రభుత్వం బడ్జెట్లో ప్రతిపాదించింది.