హైదరాబాద్, జూలై 25 (నమస్తే తెలంగాణ): కాంగ్రెస్ ప్రభుత్వం ఆటో కార్మికులకు మొండి చేయిచ్చింది. ఏటా ఆర్థికసాయం అందజేస్తానన్న ప్రభుత్వం.. దానికోసం బడ్జెట్లో ఎలాంటి కేటాయింపులు చేయలేదు. దీంతో ప్రభుత్వం మరోసారి తమను నమ్మించి మోసం చేసిందని ఆటో కార్మికులు ఆవేదన వ్యక్తం చేస్తున్నారు. ఆటో కార్మికుల సంక్షేమ బోర్డును ఏర్పాటు చేస్తామని, ఆటో కార్మికులను ఆదుకోవడానికి ఓ లా, ఉబెర్ తరహాలో యాప్ను తీసుకొస్తామని ప్రభుత్వం హామీ ఇచ్చింది. ఆ టో కార్మికులకు ఏడాదికి రూ.12 వేలు ఆర్థిక సాయం చేస్తామని ప్రభుత్వం హామీ ఇచ్చింది. ఏప్రిల్ నుంచి వీటిని అమలు చేస్తామనే ప్రభుత్వం ప్రకటించింది. ఈ విషయాన్ని ఎన్నికల మ్యానిఫెస్టోలోనూ ప్రకటించారు. వాటికోసం కేటాయింపులు చేయకపోవడంతో ఆటో కార్మికులు ఆందోళన చెందుతున్నారు.