మంథని, ఏప్రిల్ 2 : రాష్ట్రంలో 200 మంది రైతుల ఆత్మహత్యకు కాంగ్రెస్ ప్రభుత్వమే కారణమని బీఆర్ఎస్ పెద్దపల్లి ఎంపీ అభ్యర్థి కొప్పుల ఈశ్వర్ ఆరోపించారు. పెద్దపల్లి జిల్లా మంథనిలో ఎండిపోయిన పంట పొలాలను జడ్పీ చైర్మన్ పుట్ట మధూకర్తో కలిసి ఆయన మంగళవారం పరిశీలించారు. ఈ సందర్భంగా ఎండిన పంటలను చూసి రోదిస్తున్న రైతులను ఓదార్చారు.
అనంతరం ఆయన మాట్లాడుతూ.. మాయమాటలతో అధికారంలోకి వచ్చిన కాంగ్రెస్ సర్కారు రైతులను రోడ్డున పడేసిందని అన్నారు. యాసంగిలో సాగునీరు కోసం రైతులు రోడ్డెక్కినా కాంగ్రెస్ ప్రభుత్వంలో చలనం రావడంలేదని విమర్శించారు. ఇప్పటికైనా సాగునీరు విడుదల చేసి, పంట నష్టపోయిన రైతులకు ఎకరానికి రూ.25 వేల పరిహారం అందించాలని, ధాన్యానికి రూ.500ల బోనస్ ప్రకటించాలని డిమాండ్ చేశారు.