Graduate MLC Results | నల్లగొండ : నల్లగొండ – ఖమ్మం – వరంగల్ ఎమ్మెల్సీ ఎన్నికల ఓట్ల లెక్కింపు ప్రక్రియ కొనసాగుతోంది. ఇప్పటి వరకు మొదటి ప్రాధాన్యత ఓట్ల లెక్కింపునకు సంబంధించి మూడు రౌండ్ల లెక్కింపు పూర్తయింది. మొదటి ప్రాధాన్యత ఓట్లలో 2,64,216 ఓట్లను వ్యాలిడ్ ఓట్లుగా గుర్తించారు. ఇందులో కాంగ్రెస్ అభ్యర్థి తీన్మార్ మల్లన్నకు 1,06,234 ఓట్లు, బీఆర్ఎస్ అభ్యర్థి రాకేశ్ రెడ్డికి 87,356 ఓట్లు, బీజేపీకి 34,516 ఓట్లు, స్వతంత్ర అభ్యర్థి అశోక్గౌడ్కు 27,493 ఓట్లు పోలయ్యాయి.
తొలి రౌండ్లో 7670, రెండో రౌండ్లో 7001, మూడో రౌండ్లో 4,208 ఓట్ల మెజార్టీ మల్లన్నకు వచ్చింది. మొత్తం లీడ్ 18,878. కాగా చివరి రౌండ్ అయిన నాలుగో రౌండ్లో 48,013 ఓట్లను లెక్కిస్తున్నారు. నాలుగో రౌండ్ కూడా పూర్తి అయిన తర్వాత, చెల్లుబాటైన ఓట్లలో 50%+1 ఓటుతో గెలుపు కోటా నిర్ధారణ కానుంది. అయితే మొదటి ప్రాధాన్యత ఓట్లలో గెలుపు కోటాకు అభ్యర్థులు దూరంగా ఉన్నారు. ఇవాళ సాయంత్రం 7 గంటల తరువాత ఎలిమినేషన్ పద్దతిలో ద్వితీయ ప్రాధాన్యత ఓట్ల లెక్కింపు చేపట్టనున్నారు. రెండో ప్రాధాన్యత ఓట్లల్లో విజేత ఎవరో తేలనుంది. రేపు మధ్యాహ్నం సమయంలో విజేత తేలే అవకాశం ఉంది.