వాజేడు, జూన్ 8 : మంచినీటి కోసం ములుగు జిల్లా వాజేడు మండలం టేకులగూడెం చెలక గ్రామస్థులు అవస్థలు పడుతున్నారు. గ్రామానికి తాగునీటిని అందించే మోటర్ నాలుగైదు రోజులుగా నడవడం లేదు. దీంతో గ్రామస్థులు నీటి కోసం సతమతమవుతున్నారు. తప్పని పరిస్థితుల్లో చిన్నా, పెద్దా అనే తేడా లేకుండా సుమారు రెండు కిలోమీటర్ల దూరంలో ఉన్న గోదావరి నదికి నడిచి వెళ్లి బిందెలు, డబ్బాల్లో నీటిని తెచ్చుకుంటున్నారు. అధికారులు వెంటనే స్పందించి తాగునీటి సమస్యను పరిష్కరించాలని కోరుతున్నారు. ఈ విషయమై ఇన్చార్జి పంచాయతీ కార్యదర్శి బందం రవీందర్ను ఫోన్లో వివరణ కోరగా.. మోటర్ పాడైపోవడంతో గోదావరి నీళ్లు రావడం లేదన్నారు. వెంటనే మరమ్మతు చేయించి గోదావరి నీటిని గ్రామస్థులకు అందిస్తామని తెలిపారు.