హైదరాబాద్, జూలై 11 (నమస్తే తెలంగాణ): వైద్యశాఖలో బదిలీలు గందరగోళంగా తయారవుతున్నాయి. తమ గోడును అధికారులు వినకపోవడంతో ఉద్యోగులు గురువారం కోఠిలోని డీపీహెచ్ కార్యాలయాన్ని ముట్టడించారు. సీనియార్టీ జాబితాను అస్తవ్యస్తంగా రూపొందించారని, మార్చాలని ఎన్నిసార్లు అడిగినా పట్టించుకోవడం లేదని ఆందోళన వ్యక్తం చేశారు. ఆ సమయంలో డీపీహెచ్ రవీంద్రనాయక్ అందుబాటులో లేకపోవడంతో గంటలపాటు అక్కడే నిరసన తెలిపారు. తాము అప్లోడ్ చేసిన వివరాలు మారిపోయాయని పలువురు అభ్యర్థులు ఆందోళన వ్యక్తం చేశారు. తప్పులు సరిచేయడానికి ఎడిట్ ఆప్షన్ కూడా లేదన్నారు. సీనియార్టీ తప్పుగా నమోదైందంటూ చాలా మంది ఆవేదన వ్యక్తం చేశారు. వైద్యారోగ్య శాఖలో బదిలీల్లో గందరగోళంపై టీటీజీడీఏ ఆగ్రహం వ్యక్తం చేసింది.
ప్రభుత్వ, ప్రైవేటు దవాఖానల్లో నాణ్యత, పారదర్శకత పెంచటానికి వేర్వేరుగా కమిటీలను నియమిస్తామని వైద్యారోగ్య శాఖ మంత్రి దామోదర రాజనర్సింహ పేర్కొన్నారు. ప్రైవేట్ దవాఖానల ఆగడాలపై నిఘా కొనసాగుతుందన్నారు. గురువారం ఆయన సచివాలయంలో కార్పొరేట్ దవాఖానల యజమన్యాలతో మాట్లాడుతూ.. క్లినికల్ ఎస్టాబ్లిష్మెంట్ యాక్ట్ను కఠినంగా అమలు చేస్తామని చెప్పారు. సామాజిక బాధ్యతగా ప్రభుత్వ దవాఖానలకు తమవంతు సహకారం అందించాలని కోరారు. ఆరోగ్యశ్రీ బకాయిలు త్వరగా విడుదల చేయాలని దవాఖానల యజమానులు, ప్రతినిధులు మంత్రికి విజ్ఞప్తి చేశారు.