గద్వాల, జూన్ 15 : గతంలో జోగుళాంబ గద్వాల కలెక్టర్గా పనిచేసి.. ప్రస్తుతం సంగారెడ్డి కలెక్టర్గా విధులు నిర్వర్తిస్తున్న వల్లూరు క్రాంతి అవినీతి, అక్రమాలపై విచారణ చేపట్టాలని కాంగ్రెస్ నేతలు సీఎస్ కార్యాలయంలో ఫిర్యాదు చేశారు. జోగుళాంబ గద్వాల జిల్లాలో అప్పటి ప్రజాప్రతినిధులకు సహకరిస్తూ.. తన తండ్రి ద్వారా ఆర్థిక లావాదేవీలు నిర్వహించి అధికార దుర్వినియోగం, అక్రమాలకు పాల్పడిన వల్లూరు క్రాంతిపై చర్యలు తీసుకోవాలని సీఎస్ కార్యాలయంలో జిల్లా కాంగ్రెస్ కౌన్సిలర్లు షేక్ శావలి, శంకర్, నేతలు ఇసాక్, గౌస్, రాజేంద్ర, ఆర్డీఎస్ మాజీ చైర్మన్ తనగల సీతారామిరెడ్డి తదితరులు శుక్రవారం ఫిర్యాదు చేశారు. ఆయా మండలాల్లో పేద రైతుల భూ రికార్డులు సరిగ్గా ఉన్నా లేవని, లేని వాటిని సరిచేసేందుకు తన తండ్రి ద్వారా ఆర్థిక లావాదేవీలు నడిపి రికార్డులు మార్చి పాస్పుస్తకాలు ఇచ్చారని ఫిర్యాదులో పేర్కొన్నారు. డబ్బులు ఇవ్వలేని రైతుల వినతులను పెండింగ్లో ఉంచిందని ఆరోపించారు. అలాగే నిషేధిత జాబితాలలో నుంచి వందల ఎకరాల భూమిని తొలగించి పెద్ద ఎత్తున ఆర్థిక లావాదేవీలు చేశారని ఫిర్యాదులో పేర్కొన్నారు.