Runa Mafi | మరికల్, జూలై 21: నారాయణపేట జిల్లా మరికల్ మండల కేంద్రానికి చెందిన రైతు గొల్ల రాములు 2015లో పాస్బుక్కు జతచేసి రూ.45 వేల రుణం తీసుకున్నాడు. ఇటీవల కాంగ్రెస్ ప్రభుత్వం రూ.లక్ష లోపు రుణమాఫీ చేసినట్టు ప్రకటించిన జాబితాలో రాములు పేరు లేదు. దీంతో ఈ నెల 19న ‘నమస్తే తెలంగాణ’ దినపత్రికలో ‘కేసీఆర్ మాఫీ చేసిండు.. ఇప్పుడు కాలే’ శీర్షికన రాములు అభిప్రాయం ప్రచురితమైంది. ఈ మేరకు రాష్ట్ర వ్యవసాయ శాఖ కమిషనర్ మరికల్ ఏఈవో పరశురాంకు ఫోన్ చేసి గొల్ల రాములు వివరాలు పంపాలని ఆదేశించారు.\ ఏఈవో పరశురాం బ్యాంక్ అధికారుల నుంచి రైతు వివరాలు సేకరించారు. పాస్బుక్కు లేకపోవడంతోనే రుణమాఫీ జాబితాలో పేరు రాలేదని బ్యాంక్ అధికారులు స్టేటస్ ఇచ్చినట్టు పరశురాం తెలిపారు. రైతు రాములు మాట్లాడుతూ.. తన పేరుమీద భూమి, పాస్బుక్కు లేకపోతే అప్పు ఎలా ఇచ్చారంటూ అధికారుల తీరును ప్రశ్నించాడు. తాను తీసుకున్న రుణం రూ.45 వేలను మాఫీ చేయాలని డిమాండ్ చేశాడు.