CM Revanth Reddy | హైదరాబాద్, జూలై 21 (నమస్తే తెలంగాణ): సీఎం రేవంత్రెడ్డి ఆదివారం ఢిల్లీకి వెళ్లారు. రెండు రోజుల పర్యటన తర్వాత సోమవారం రాత్రికి తిరిగి వచ్చే అవకాశం ఉన్నది. రేవంత్రెడ్డి సీఎంగా బాధ్యతలు స్వీకరించిన తర్వాత ఢిల్లీలో పర్యటించటం ఇది 18వ సారి. డిప్యూటీ సీఎం భట్టి విక్రమార్క శనివారం రాత్రే ఢిల్లీకి వెళ్లారు. వీరిద్దరూ రెండు రోజులపాటు కాంగ్రెస్ అధిష్ఠాన పెద్దలతో పలు అంశాలపై చర్చించనున్నారు. రుణమాఫీ నేపథ్యంలో వరంగల్లో నిర్వహించనున్న సభకు ఆ పార్టీ అగ్రనేత రాహుల్గాంధీని ఆహ్వానించనున్నారు. క్యాబినెట్ విస్తరణపైనా మరోసారి చర్చించనున్నట్టు తెలిసింది. ఆషాఢ మాసం ముగుస్తున్న నేపథ్యంలో మరోసారి క్యాబినెట్ విస్తరణపై ఒత్తిడి తేనున్నారు. కొత్తగా బీఆర్ఎస్ నుంచి వచ్చే ఎమ్మెల్యేలకు 3వ పేజీలో
మంత్రి పదవులు ఇవ్వటంపై స్పష్టత కోరే అవకాశం ఉన్నది.
కాంగ్రెస్ బీ ఫారంపై గెలిచిన వారికే మంత్రి పదవులు ఇస్తామని సీఎం చెప్తున్నా.. జంపింగ్ నేతలకు అవకాశం ఇవ్వాలని అధిష్ఠానం భావిస్తున్నట్టు తెలుస్తున్నది. దీంతో ఎవరెవరు వచ్చారు? ఇంకా ఎవరెవరు టచ్లో ఉన్నారు? మంత్రి పదవుల హామీ ఎవరెవరికి? ఏ ప్రాతిపదికన పదవులు కట్టబెట్టాలి? వంటి అంశాలపై కసరత్తు చేయనున్నట్టు సమాచారం. దీంతోపాటు పీసీసీ అధ్యక్షుడి ఎంపికకు సస్పెన్స్ను తెరదించాలని సీఎం, డిప్యూటీ సీఎం అధిష్ఠానాన్ని కోరనున్నట్టు తెలిసింది. పార్టీ అధ్యక్షుడిని ప్రకటించేందుకు ఇంత సమయం తీసుకోవటంపై పార్టీలో, ప్రజల్లో అసంతృప్తి చెలరేగుతున్న విషయాన్ని పెద్దల దృష్టికి తీసుకెళ్లనున్నట్టు సమాచారం. రాబోయే స్థానిక ఎన్నికలకు పార్టీని సన్నద్ధం చేయాలంటే అత్యవసరంగా అధ్యక్షుడిని ప్రకటించాలని పట్టుబట్టనున్నట్టు తెలిసింది. వీటితోపాటు రాష్ట్ర బడ్జెట్ సమావేశాలపైనా చర్చించనున్నట్టు తెలిసింది. సమావేశాల నిర్వహణ సందర్భంగా ఎమ్మెల్యేల చేరికను సమర్థించుకోవడం, ప్రతిపక్షాల విమర్శలను తిప్పికొట్టడంపై చర్చించనున్నట్టు విశ్వసనీయ వర్గాలు తెలిపాయి.