హైదరాబాద్, జూలై 9 (నమస్తే తెలంగాణ): తెలంగాణకు మంజూరైన జాతీయ రహదారుల నిర్మాణ పనులను వెంటనే చేపట్టాలని సీఎం రేవంత్రెడ్డి జాతీయ రహదారుల ప్రాధికార సంస్థ (ఎన్హెచ్ఏఐ) అధికారులను కోరారు. ఈ రహదారుల నిర్మాణానికి రాష్ట్ర ప్రభుత్వం సంపూర్ణ సహకారాన్ని అందిస్తుందని, ఏవైనా ఆటంకాలు ఉంటే వెంటనే తొలగిస్తామని హామీ ఇచ్చారు.
తెలంగాణలో ఏర్పాటుచేసే డ్రైపోర్టును ఏపీలోని బందర్ పోర్టుతో అనుసంధానించేందుకు హైస్పీడ్ ఎక్స్ప్రెస్వేను నిర్మించాలని విజ్ఞప్తి చేశారు. ఎన్హెచ్ఏఐ ఉన్నతాధికారులు మంగళవారం రేవంత్రెడ్డితో ఆయన నివాసంలో సమావేశమయ్యారు.
రాష్ట్రంలో ఎన్హెచ్ఏఐ చేపడుతున్న రహదారుల నిర్మాణానికి అవసరమైన భూసేకరణతోపాటు పలు ఇతర ఇబ్బందులను వివరించారు. దీంతో ఈ సమస్యల పరిషారానికి బుధవారం సచివాలయంలో ఉన్నతస్థాయి సమావేశం నిర్వహిస్తామని సీఎం చెప్పారు. హైదరాబాద్-మన్నెగూడ రహదారి కాంట్రాక్టు సంస్థతో ఉన్న సమస్యలను చర్చల ద్వారా పరిష్కరించుకొని త్వరగా నిర్మాణ పనులను ప్రారంభించాలని కోరారు.
హైదరాబాద్-విజయవాడ జాతీయ రహదారి విస్తరణ పనులతోపాటు హైదరాబాద్-కల్వకుర్తి జాతీయ రహదారి నిర్మాణ పనులను వెంటనే మొదలు పెట్టాలని విజ్ఞప్తి చేశారు. హైదరాబాద్-విజయవాడ మధ్య గ్రీన్ఫీల్డ్ హైవే మంజూరు కోసం ఏపీ చేస్తున్న ప్రయత్నాలను ఎన్హెచ్ఏఐ అధికారుల దృష్టికి తీసుకెళ్లారు. తెలంగాణ ప్రభుత్వం ప్రతిష్ఠాత్మకంగా తీసుకున్న రీజినల్ రింగ్ రోడ్డు (ట్రిపుల్ఆర్) నిర్మాణానికి సహకరించాలని కోరారు.
‘భారత్మాల’ పథకం కింద ట్రిపుల్ఆర్ నిర్మాణాన్ని చేపట్టాలని ఇటీవల ప్రధాని నరేంద్రమోదీకి విజ్ఞప్తి చేసిన విషయాన్ని వారికి గుర్తుచేశారు. హైదరాబాద్ ఔటర్ రింగ్ రోడ్డు, ట్రిపుల్ఆర్ మధ్యలో 12 రేడియల్ రోడ్లు వస్తాయని తెలిపారు. రాష్ట్రంలో రహదారుల నిర్మాణంపై ప్రతివారం తనకు నివేదిక ఇవ్వాలని సీఎంవో కార్యదర్శి షానవాజ్ ఖాసీంను ఆదేశించారు. సమావేశంలో రాష్ట్ర ఆర్అండ్బీ శాఖ మంత్రి కోమటిరెడ్డి వెంకట్రెడ్డి, ఎన్హెచ్ఏఐ ప్రాజెక్టుల సభ్యుడు అనిల్ దరి, ఆర్అండ్బీ స్పెషల్ సెక్రటరీ దాసరి హరిచందన తదితరులు పాల్గొన్నారు.
ఎన్హెచ్ఏఐ అధికారుల విన్నపాలు