హైదరాబాద్, జూన్ 23(నమస్తే తెలంగాణ): సీఎం రేవంత్రెడ్డి సోమవారం ఢిల్లీ వెళ్లనున్నారు. కాంగ్రెస్ జాతీయ అధ్యక్షుడు మల్లికార్జున ఖర్గే, అగ్రనేతలు సోనియా, రాహుల్గాంధీతో ఆయన భేటీ కానున్నట్టు సమాచారం. రాష్ట్రంలో మంత్రివర్గ విస్తరణతోపాటు నామినేటెడ్ పోస్టుల భర్తీ, కొత్త పీసీసీ అధ్యక్షుడి ఎంపికపై ఈ సందర్భంగా వారితో చర్చించే అవకాశం ఉన్నది. లోక్సభ ఎన్నికలకు ముందు నిలిపివేసిన వివిధ కార్పొరేషన్ల చైర్మన్ల జాబితాపైనా అధిష్ఠానంతో చర్చించే అవకాశం ఉన్నది. లోక్సభ ఎన్నికల్లో తక్కువ సీట్లు రావడంపైనా ఆయన వివరణ ఇవ్వనున్నట్టు తెలిసింది. సోమవారం పార్లమెంట్ సమావేశాలు ప్రారంభంకానున్న సందర్భంగా రాష్ట్ర కాంగ్రెస్ ఎంపీలతో సీఎం భేటీ అవుతారని తెలిసింది.