హైదరాబాద్, మే 21 (నమస్తే తెలంగాణ): రాష్ట్ర ముఖ్యమంత్రి కార్యాలయ (సీఎంవో) అధికారిక సోషల్ మీడియా హ్యాండిళ్ల ద్వారా ఎన్నికల కోడ్ ఉల్లంఘనలు జరుగుతున్నాయి. సీఎం రేవంత్రెడ్డి పాల్గొన్న రాజీవ్గాంధీ వర్ధంతి లాంటి కాంగ్రెస్ పార్టీ కార్యక్రమాలను సైతం ఆ హ్యాండిళ్లలో పోస్టు చేస్తున్నారు. దీనిపై సర్వత్రా విమర్శలు వెల్లువెత్తున్నా అధికారులు నిమ్మకు నీరెత్తినట్టు వ్యవహరిస్తున్నారు. దీనిపై రాష్ట్ర ప్రభుత్వ డిజిటల్ మీడియా మాజీ డైరెక్టర్ కొణతం దిలీప్ ఎన్నికల సంఘంతోపాటు రాష్ట్ర ప్రభుత్వ ప్రధాన కార్యదర్శి శాంతికుమారికి ఫిర్యాదు చేశారు.
అనంతరం తన ఫిర్యాదుపై ‘ఎక్స్’ ద్వారా సుదీర్ఘ వివరణ ఇచ్చారు. ‘సీఎంవో అధికారిక సోషల్ మీడియా హ్యాండిళ్ల ద్వారా ఎన్నికల కోడ్ ఉల్లంఘనలు జరుగుతున్న విషయాన్ని మీ దృష్టికి తీసుకొస్తున్నాను. ఎన్నికల కోడ్ అమల్లో ఉన్నప్పుడు ముఖ్యమంత్రి అధికారిక సోషల్ మీడియా హ్యాండిళ్లలో ఎలాంటి అప్డేట్లు లేదా ఫోటోగ్రాఫ్లు/వీడియోలను పోస్ట్ చేయకూడదు. కానీ, ఈ నిబంధనలను తుంగలో తొక్కుతున్నారు. ఈ ఉల్లంఘనలకు బాధ్యులైన అధికారులపై ఎన్నికల సంఘం, సీఎస్ కఠిన చర్యలు చేపట్టాలి. ప్రస్తుతం రాష్ట్రంలో ఎన్నికల అమలులో ఉన్నందున సీఎంవో సోషల్ మీడియా హ్యాండిళ్లలో ఇటీవల పోస్టు చేసిన అన్ని అప్డేట్లను తక్షణమే తొలగించడంతోపాటు జూన్ 5 వరకు వాటిలో ఎలాంటి అప్డేట్లు పోస్టు చేయకుండా చూడాలి’ అని దిలీప్ ఆ వివరణలో పేర్కొన్నారు.