కాంగ్రెస్ పార్టీ విధానానికి, పార్టీ అధ్యక్షుడు రాహుల్ గాంధీ ప్రవచనాలకు విరుద్ధంగా తెలంగాణలో ఫిరాయింపులను ప్రోత్సహించడంపై పార్టీ ఎమ్మెల్సీ, సీనియర్ నేత జీవన్రెడ్డి తిరుగుబాటు బావుటా ఎగురవేశారు. అవసరం లేకున్నా ప్రత్యర్థి పార్టీల ఎమ్మెల్యేలను పార్టీ మార్పించడం అనైతికమని, ఇది కాంగ్రెస్ ప్రవచించిన పాంచ్ న్యాయ్ సిద్ధాంతానికి వ్యతిరేకమని ఆయన కుండబద్దలు కొట్టారు.
బాన్సువాడ ఎమ్మెల్యే పోచారం శ్రీనివాసరెడ్డిని, జగిత్యాల ఎమ్మెల్యే సంజయ్ని చేర్చుకోవడంపై ఆగ్రహంతో ఉన్న జీవన్రెడ్డి ఈ విషయంలో వెనక్కితగ్గే సమస్యేలేదని తేల్చిచెప్పారు. రెండు రోజులుగా ఎడతెరపిలేకుండా చర్చలు జరుపుతున్నా, ఏకంగా కాంగ్రెస్ రాష్ట్ర వ్యవహారాల ఇన్చార్జి దీపాదాస్ మున్షీ స్వయంగా ఫోన్ చేసి నాలుగైదు సార్లు మాట్లాడినా జీవన్రెడ్డి తన వాదనకే కట్టుబడి ఉన్నట్టు ఆయన సన్నిహితులు చెప్పారు. ఇది పదవుల సమస్యకాదని, ఇది విలువల సమస్య అని, తనకు మాట మాత్రమైనా చెప్పకుండా తన నియోజకవర్గానికి చెందిన ప్రత్యర్థి పార్టీ ఎమ్మెల్యేను కాంగ్రెస్లో చేర్చుకోవడం తనను అవమానించడమేనని, ఈ విషయంలో రాజీపడే సమస్యేలేదని జీవన్రెడ్డి చెప్పినట్టు సన్నిహితులు పేర్కొన్నారు.
జీవన్రెడ్డి పట్టుదల చూస్తుంటే రాజీనామా చేయడం ఖాయమని వారు వ్యాఖ్యానించారు. మంగళవారమే రాజీనామా చేయాలని నిర్ణయించుకున్నప్పటికీ శాసన మండలి అధికారులను అందుబాటులో లేకుండా చేయడంపై కూడా జీవన్రెడ్డి మండిపడుతున్నట్టు తెలిసింది. మరోవైపు జీవన్రెడ్డిని సముదాయించడానికి వచ్చిన మంత్రులు భట్టి విక్రమార్క, శ్రీధర్బాబు ఏం చేయాలో తెల్వక తలలు పట్టుకున్నారు. ఇటు కాంగ్రెస్ను కష్టకాలంలో కాపాడిన ఒక సీనియర్ నేతకు అన్యాయం, అటు పార్టీ పరువు ప్రతిష్ఠల నడుమ మంత్రులు మింగలేని, కక్కలేని పరిస్థితిలో చిక్కుకున్నారు. ఈ వ్యవహారం ఇక్కడితో ఆగకపోవచ్చని భట్టి, శ్రీధర్బాబు మాట్లాడిన మాటలు సంకేతాలిచ్చాయి.
జీవన్రెడ్డి లాంటి సీనియర్ నేతకు హామీలు ఇచ్చే స్థాయిలో తాములేమని శ్రీధర్బాబు పేర్కొనగా, కాంగ్రెస్ అధికారంలోకి రావడానికి జీవన్రెడ్డి లాంటి సీనియర్ నాయకులే కారణమని, వాళ్లకు ఇబ్బంది కలిగితే తమలాంటి సీనియర్లందరికీ ఇబ్బంది కలిగినట్టేనని భట్టి తనదైన శైలిలో గుంభనంగా వ్యాఖ్యానించారు. సీనియర్ నాయకులను కోల్పోయే స్థితిలో తమపార్టీ లేదని కూడా ఆయన తేల్చిచెప్పారు. జీవన్రెడ్డిని బుజ్జగించేందుకు ఒకవైపు కాంగ్రెస్ మంత్రులు అష్టకష్టాలు పడుతుంటే మరోవైపు ముఖ్యమంత్రి శిబిరం నుంచి మాత్రం భిన్నమైన సంకేతాలు లీకవుతున్నాయి. ఉంటే ఉండనీ, పోతే పోనీ అన్న తరహాలో ఆ శిబిరం నుంచి సిగ్నల్స్ అందుతున్నట్టు పార్టీలోని విశ్వసనీయ వర్గాలు పేర్కొంటున్నాయి.
హైదరాబాద్, జూన్ 25 (నమస్తే తెలంగాణ): ‘జీవన్రెడ్డి పోతే పోనీ, ఏమైతది? ఆయన పోతే గవర్నమెంట్ కూలిపోతదా? ఇట్ల మనం వినుకుంటూ పోతే ఇట్లాంటోళ్లు మరికొందరు మోపైతరు’ ఇదీ రాష్ట్ర కాంగ్రెస్లోని ఓ కీలక నేత వ్యాఖ్య. ఈ మాటలు కాంగ్రెస్లో ప్రకంపనాలు సృష్టిస్తున్నాయి. పార్టీలోకి కొత్తగా వచ్చి చేరిన ఒక నేత అధిష్ఠానం తనకు ఇలాగే ఇష్యూస్ను హ్యాండిల్ చేయమని చెప్పిందనడం గమనార్హం. జగిత్యాల ఎమ్మెల్యే డాక్టర్ సంజయ్కుమార్ను కాంగ్రెస్లోకి చేర్చుకోవడాన్ని వ్యతిరేకించిన ఎమ్మెల్సీ జీవన్రెడ్డి వ్యవహారం కాంగ్రెస్ పార్టీలో తుఫాను సృష్టిస్తున్నది.
రాష్ట్ర కాంగ్రె స్ నేతలు కొందరు వ్యవహరిస్తున్న తీరు పాత కాంగ్రెస్ నేతలకు ఆగ్రహం తెప్పిస్తున్నది. జీవన్రెడ్డి ఎమ్మెల్సీగా రాజీనామా చేస్తానని ప్రకటించిన నేపథ్యంలో రాష్ట్ర ముఖ్య నేతలు కీలక నేతను సంప్రదించి విషయం చెప్పారు. ఢిల్లీలో ఉన్న ఆయన జీవన్రెడ్డితో ఫోన్ చేసి మాట్లాడేందుకు కూడా ఇష్టపడలేదని కాంగ్రెస్ వర్గాలు చెప్తున్నాయి. అంతే కాదు, ‘ఒకరు పోతే పదిమంది వస్తారు. ఇట్లాంటి వాళ్లను వదిలించుకుందాం’ అని అన్నట్టు కాంగ్రెస్ వర్గాల్లో ప్రచారం జరుగుతున్నది. పాత వారిని పొగబెట్టి పంపిస్తున్నారన్న మెసేజ్ ప్రజల్లోకి వెళ్తుందని, ఇది ఇబ్బందేమో అని ఓ కీలక మంత్రి అన్నట్టు తెల్సింది. ‘ఇప్పుడు పొమ్మన్నాపోడు. ఉత్తగనే బెదిరిస్తున్నట్టున్నాడు’ అని కూడా ఆ కీలక నేత వ్యాఖ్యానించినట్టు ప్రచారం జరుగుతున్నది.
జీవన్రెడ్డి వెళ్తే పార్టీకి నష్టమని భావించిన ఒకరిద్దరు నేతలు విషయాన్ని పార్టీ హైకమాండ్కు చెప్పడంతోపాటు జీవన్రెడ్డిని బుజ్జగించే పనికి ఉపక్రమించారు. ఈ క్రమంలోనే పార్టీలోని ఒక వర్గం పనిగట్టుకొని పాత కాంగ్రెస్ నేతలను అస్థిరతకు గురిచేస్తున్న విషయంపై చర్చకు వచ్చినట్టు తెల్సింది. జీవన్రెడ్డి కూడా ఇదే విషయాన్ని కొందరు మంత్రులు, నేతలకు విస్పష్టంగా చెప్పినట్టు తెలిసింది. తెలుగుదేశం, బీఆర్ఎస్ నుంచి నేతలను చేర్చుకొని అసలు కాంగ్రెస్ను రూపుమాపే కుట్ర జరుగుతున్నట్టు జీవన్రెడ్డి వద్దకు వచ్చిన కొందరు కాంగ్రెస్ నేతలు కూడా వ్యాఖ్యానించినట్టు సమాచారం.
రాష్ట్ర స్థాయిలోని కీలక నేత జీవన్రెడ్డి వెళ్లిపోతే పోనీయమంటూ చేసిన వ్యాఖ్యలపై కొందరు సీనియర్ మంత్రులు అసహనం వ్యక్తం చేసినట్టు తెలిసింది. ఇది పద్ధతి కాదని, ఇప్పుడు జీవన్రెడ్డి వ్యవహారంలో అయినదే మనకు కూడా అవుతుంది కదా అని, పార్టీలో చేర్చుకునే ముందు సంప్రదింపులుండాలని, ఉమ్మడి కరీంనగర్ జిల్లాతో సంబంధంలేని వ్యక్తి చేరికల బాధ్యత తీసుకోవడం సరికాదని పలువురు మంత్రులు అన్నట్టు తెలిసింది. మంత్రులు కొందరు జీవన్రెడ్డి వ్యవహారాన్ని చల్లబరిచేందుకు అనుసరించాల్సిన వ్యూహం పై భేటీ అయినట్టు సమాచారం. ఈ సందర్భంగానే వారు పార్టీ పరిస్థితిపై ఆవేదన వ్యక్తం చేసినట్టు తెలిసింది.