హైదరాబాద్, జూలై 23(నమస్తే తెలంగాణ): కేంద్ర బడ్జెట్లో తెలంగాణకు అన్యాయం చేయడంపై సీఎం రేవంత్రెడ్డి ఫైర్ అయ్యారు. తెలంగాణపై ప్రధాని మోదీ వివక్షకు మించి కక్ష గట్టారని మండిపడ్డారు. మంగళవారం జూబ్లీహిల్స్లోని తన నివాసంలో మీడియా సమావేశంలో మాట్లాడుతూ.. బడ్జెట్లో అసలు తెలంగాణ పదమే లేకపోవడం దారుణమని అన్నారు. మోదీ తెలంగాణ పదాన్ని కూడా ఉచ్ఛరించేందుకు ఇష్టపడడం లేదని విమర్శించారు. తెలంగాణ అభివృద్ధికి నిధులు కేటాయించాలని 18సార్లు కలిసి విన్నవించినా ప్రయోజనం లేకుండాపోయిందని ఆవేదన వ్యక్తంచేశారు. పెద్దన్న అంటూ సంబోధించి విన్నవించినా దుర్మార్గంగా వ్యవహరించారని విమర్శించారు.
రాష్ట్ర విభజన చట్టం ప్రకారం ఏపీకి నిధులు కేటాయించారని, మరి తెలంగాణను ఎందుకు విస్మరించారని ప్రశ్నించారు. ఈ బడ్జెట్ను ‘కుర్చీ బచావ్ బడ్జెట్’ అంటూ అభివర్ణించారు. పక్కాగా క్విడ్ ప్రోకో అని ఆరోపించారు. తెలంగాణ ప్రజలు బీజేపీకి ఎనిమిది ఎంపీ సీట్లు ఇస్తే.. మోదీ మాత్రం తెలంగాణపై కక్షగట్టారని మండిపడ్డారు. తెలంగాణకు అన్యాయంపై కిషన్రెడ్డి బాధ్యత వహించి మంత్రి పదవికి రాజీనామా చేసి తెలంగాణ ప్రజలకు క్షమాపణ చెప్పాలని డిమాండ్ చేశారు. ఇప్పటికైనా కేంద్ర మంత్రులు, ఎంపీలు మోదీ బానిసలుగా కాకుండా తెలంగాణ పౌరులు గా ఆలోచించాలని హితవు పలికారు.
నేడు అసెంబ్లీలో తీర్మానం..
కేంద్ర బడ్జెట్లో తెలంగాణకు జరిగిన అన్యాయం, మోదీ వివక్షను వ్యతిరేకిస్తూ అసెంబ్లీలో తీర్మానం చేసి కేంద్రానికి పంపిస్తామని సీఎం రేవంత్రెడ్డి తెలిపారు. ఇందుకు అన్ని పార్టీలు కలిసి రావాలని పిలుపునిచ్చారు. దక్షిణాది రాష్ర్టాలపై బీజేపీ చూపుతున్న వివక్షపై దక్షిణాది రాష్ర్టాల సీఎంలతో సమావేశం నిర్వహించనున్నట్టు తెలిపారు. ఇప్పటికే తమిళనాడు, కర్ణాటక సీఎంలకు సమాచారం ఇచ్చానని, కేరళ సీఎం కూడా తమతో కలిసి వస్తే బాగుంటుందని తెలిపారు. ఏపీ సీఎం వస్తారో లేదా అనేది వాళ్ల ఇష్టమని పేర్కొన్నారు.