పాలమూరు, అక్టోబర్ 7: ఉద్యోగులు, ఉపాధ్యాయ సంఘాలకు బీఆర్ఎస్ సర్కా రు ఎల్లప్పుడూ అండగా ఉంటుందని క్రీడాశాఖ మంత్రి శ్రీనివాస్గౌడ్ తెలిపారు. శనివారం రాత్రి మహబూబ్నగర్ జిల్లా కేం ద్రంలోని శిల్పారామంలో ఏర్పాటు చేసిన పీఆర్టీయూ ఆత్మీయ సమ్మేళనానికి ఆయన ముఖ్యఅతిథిగా హాజరయ్యారు. ముందుగా మంత్రిని సంఘం నాయకులు ఘనంగా సన్మానించారు. రాబోయే ఎన్నికల్లో శ్రీనివాస్గౌడ్ను మరోసారి అఖండ మెజారిటీతో గెలిపించుకుంటామని సంఘం రాష్ట్ర ప్రధాన కార్యదర్శి కమలాకర్, నాయకులు స్పష్టం చేశారు. ఆయనకు తాము సంపూర్ణ మద్దతు ఇస్తున్నట్టు ప్రకటించారు. ఈ సందర్భంగా మంత్రి మాట్లాడుతూ.. పీఆర్టీయూ నాయకుడి కుమారునిగా, ఉద్యోగ సంఘాలు, ఉద్యమ నేతగా.. ఉద్యోగ, ఉపాధ్యాయులపై ప్రత్యేక అభిమానంతో పనిచేస్తానని తెలిపారు. వారికి ప్రభుత్వం, తాను వెన్నంటే ఉంటామని భరోసా ఇచ్చారు. ఈ కార్యక్రమంలో సంఘం మాజీ రాష్ట్ర ప్రధాన కార్యదర్శి చెన్నకేశవరెడ్డి, జిల్లా అధ్యక్షుడు నారాయణగౌడ్, జిల్లా ప్రధాన కార్యదర్శి రఘురాంరెడ్డి, జిల్లా గౌరవ అధ్యక్షుడు గోపాల్ నాయక్, యూనియన్ నాయకులు, ఉపాధ్యాయులు పెద్ద ఎత్తున పాల్గొన్నారు.