CM KCR Public Meeting | హైదరాబాద్, ఆగస్టు 20 (నమస్తే తెలంగాణ): రాష్ట్రంలో ఎలక్షన్ల కాలం మొదలైందని, కల్లాలకాడికి అడుక్కునేటోళ్లు వచ్చినట్టు ఇతర పార్టీల నేతలు వచ్చి మాయమాటలు చెప్తారని, ప్రజలు ఆగం కావొద్దని ప్రజలకు ముఖ్యమం త్రి కే చంద్రశేఖర్రావు సూచించారు. సూర్యాపేటలో ఆదివారం నిర్వహించిన ప్రగతి నివేదన బహిరంగ సభలో సీఎం కేసీఆర్ మాట్లాడారు. 50 ఏండ్లు అధికారంలో ఉన్న కాంగ్రెస్ ఏపాటి అభివృద్ధి చేసిందో గుర్తు చేసుకోవాలని కోరారు. కర్ణాటకలో ప్రజలు అవినీతి బీజేపీని గద్దె దిం చి, కాంగ్రెస్కు అధికారమిస్తే, వాళ్లకు పాలన చేతగాక చేతులెత్తేశారని ఎద్దేవా చేశారు. నేడు దేశానికే ఆదర్శంగా నిలిచిన తెలంగాణ రైతుల కు అలాంటి బాధలు మళ్లీ కావాలా? అని ప్రశ్నించారు. ధరణిని తీసేస్తే మళ్లీ పైరవీకారులు వచ్చి రైతుల రక్తం తాగుతారని హెచ్చరించారు. ఎవరెన్ని చెప్పినా రాష్ట్రంలో మళ్లీ రాబోయేది బీఆర్ఎస్ ప్రభుత్వమేనని స్పష్టం చేశా రు. వీటితోపాటు అనేక అంశాలు చెప్పారు సీ ఎం కేసీఆర్. ఆ వివరాలు ఆయన మాటల్లోనే..
ఆగమాగం కావొద్దు
మనం ఎలక్షన్ల కాలంలో కాలువెట్టినం. ఊర్లల్ల వరికోతలు అయ్యేటప్పుడు పంట కల్లాల కాడికి అడుక్కునోటోళ్లు వస్తుంటరు. ఒకడు హార్మోనియం పట్టుకొని వస్తడు, ఒకడు మద్దెల వట్టుకొని వస్తడు, ఒక్కొక్కడు ఒక్కో రకం పాట పాడుతుంటరు. ఎన్నికలప్పుడు కూ డా కొందరు బయల్దేరుతరు. సూర్యాపేట నుం చి రాష్ట్ర ప్రజలకు పిలుపు ఇస్తున్నా. ఇప్పుడు ఎన్నికల బరిలో ఉన్నది కాంగ్రెస్, బీజేపీ. వీళ్లేమన్నా మనకు కొత్తవాళ్లా? ఈ మధ్యన ఏమన్నా ఆకుపసరు తాగి వచ్చారా? ఒక్క అవకాశం ఇవ్వుమని అడుగుతున్నరు. గతంలో 50 ఏండ్లు ప్రజలు వాళ్లకే అధికారం ఇచ్చారు కదా? నాకన్నా రెండంతల దొడ్డుగున్నోళ్లు, పొడుగున్నోళ్లు ఎంతో మంది సీఎంలు అయ్యా రు, నల్లగొండ జిల్లా నుంచి మంత్రులు కూడా అయ్యారు. కానీ ఏనాడైనా సూర్యాపేటలో ఒకటి, నల్లగొండలో ఒకటి, భువనగిరిలో ఒక మెడికల్ కాలేజీ పెట్టాలని ఆలోచన చేశారా? మరి వాళ్లకు ఎందుకు వేయాలి ఓటు? నల్లగొండ పట్టణానికి పోతే ఆ రోడ్లేంది? ఆ కళాభారతి ఏంది? ఆ వైభోగం ఏంది! నల్లగొండ ము నుపు ఎట్లుండే? ఇప్పుడు ఎట్లున్నది? 50 ఏండ్లు అధికారంలో ఉన్న కాంగ్రెస్ పార్టీ ఈ అభివృద్ధి ఎందుకు చేయలేదు? గతంలో ఒక్కరోజైనా రైతులు చనిపోతుంటే పట్టించుకున్నారా? ఆపద్భంధు అని పెట్టి రూ.50 వేలు మన మొకాన కొట్టేవాళ్లు. అవి కూడా ఆర్నెల్లు కాళ్లరిగేలా తిరిగితే రూ.10 వేలో రూ.20 వేలో ఇచ్చి పంపించేవాళ్లు. రైతుల కష్టాలు తీర్చాలని, ఆత్మహత్య చేసుకోకుండా కాపాడాలని, కనీస మద్దతు ధర ఇప్పించాలనే ఆలోచన 50 ఏం డ్లల్లో ఎందుకు చేయలేదు? రైతులు, ప్రజలు ఎప్పుడన్నా ఆఫీసులకు పోతే కరిచినట్టు మాట్లాడి పంపేటోళ్లు.
ఇదేం అర్రాస్ పాట కాదు
బీఆర్ఎస్ ప్రభుత్వానికి కులం లేదు, జాతి లేదు, మతం లేదు, ఏ ఒక్కరినీ విస్మరించకుం డా అందరినీ కడుపులో పెట్టుకొని కాపాడుకొంటున్నం. రాష్ట్ర ఆర్థిక పరిస్థితి ఎట్లా పెరిగితే అట్లా పథకాలు అమలు చేసుకొంటున్నం. కల్యాణలక్ష్మి ప్రారంభించినప్పుడు మన పరిస్థితి ఏందో మనకు తెల్వదు కాబట్టి రూ.51 వేలు ఇచ్చినం. ఇప్పుడు రూ.లక్ష నూటపదహార్లకు పెంచుకున్నం. పెన్షన్ మొదట రూ.వెయ్యి ఇచ్చినం. తర్వాత రూ.2,016కు పెంచినం. సర్కారును నడిపించడం అంటే సంసారాన్ని నడిపించినట్టే ఉంటది. అంగను బట్టి.. వం గును బట్టి.. వైపును బట్టి నిర్ణయాలు తీసుకుంటం. 50 ఏండ్ల రాజ్యం చేసిన కాంగ్రెస్ కనీసం పెన్షన్ రూ.500, రూ.వెయ్యి కూడా ఇయ్యలేదు. రూ.200 మొకాన కొట్టేది. కానీ ఇప్పుడు చాన్స్ ఇస్తే రూ.4 వేలు ఇస్తామంటున్నరు. కాంగ్రెస్ పాలిస్తున్న ఛత్తీస్గఢ్లో, కర్ణాటకలో, రాజస్థాన్లో రూ.4 వేలు ఇస్తున్నారా? అంటే కాంగ్రెస్కు రాష్ర్టానికి ఒక నీతి ఉంటదా? ఓటు గుద్దుకొని తర్వాత మనల్ని మల్ల గుద్దితే కిందపడతం. వాళ్లు రూ.4 వేలు ఇస్తానంటే నే ను రూ.5 ఇస్తా అని అనరాదా? నాకు నాలుక లేకనా? ఇదేమన్నా అర్రాస్ పాటనా? బాధ్యతతో పోవాలె. తప్పకుండా మేం కూడా పెంచు తం. ఎంత అనేది తర్వాత ప్రకటిస్తాం.
24 గంటల కరెంటు ఉండాలా? వద్దా?
ఒకనాడు దంతాలపల్లి నుంచి వస్తుంటే రోడ్ల మీద గుంతలు చూసి ‘ఈ దంతాలపల్లి రోడ్డుకు దంతాలు ఊడిపోయేట్టు ఉన్నయి’ అని నేను అన్నాను. ఇప్పుడు రోడ్లు ఎంత మంచిగ చేసినం! ఎంత మంచి కాల్వలు తెచ్చినమో ఆలోచించాలి. సూర్యాపేటలో, తుంగతుర్తిలో గతంలో పంటల పరిస్థితి ఎట్లుండేది? ఇప్పుడు ఎక్కడ చూసినా లారీలు, ట్రాక్టర్లు రెండు నెలలు గుంజినా కూడా వడ్లు దంగుతలేవు. ఎక్కడికి పోయినా లక్ష్మి ఓలలాడుతున్నది. 50 ఏండ్ల కాంగ్రెస్ రాజ్యంలో ఇటువంటి పరిస్థితి ఎప్పుడున్నా చూసినమా? ఇప్పుడు ఇదే కాం గ్రెస్, బీజేపీవాళ్లు ఏం మాట్లాడుతున్నరు? ఒకడేమో మోటర్లకు మీటర్లు పెట్టాలంటడు, ఇంకొకడేమో వ్యవసాయానికి మూడు గంటల కరెం టు చాలంటున్నడు. కర్ణాటకలో ప్రజలు కాంగ్రెస్ను నమ్మి ఓట్లేసి గెలిపిస్తే వాళ్లకు పాలన చేతగాక చేతులు ఎత్తేశారు. బెంగళూరు నగరంలో కూడా కరెంటు కోతలు విధిస్తున్నరు. గతంలో తెలంగాణ రైతులు పడ్డ బాధలు ఇప్పుడు కర్ణాటక ప్రజలు పడుతున్నరు. పాములు కరిచి, పురుగులు కరిచి చనిపోతున్నరు. ఆ బాధలు మనకు మళ్లా కావాలా? 24 గంటల కరెంటు ఉండాలా? అని ప్రజలు నిర్ణయించుకోవాలి.
ప్రజల బాధలను ఎవడూ పట్టించుకోలె..
ఒకనాడు తుంగతుర్తి, సూర్యాపేట పరిస్థితి ఎట్లుండె? హుజూర్నగర్లో కూడా మా ఎమ్మె ల్యే నాగార్జునసాగర్ కెనాల్ లైనింగ్ కోసం ఎంబడి పడ్డడు. చివరిదాకా నీళ్లు పోయేందుకు తపన పడుతున్నడు. ఏండ్ల తరబడి ఉన్న పెద్దపెద్ద మొనగాండ్లు ఎమ్మెల్యేలు అయినా ఎవరూ పట్టించుకోలె. అందుకే నేను అందరినీ ఒకటే కోరుతున్న.. నేను చెప్పేటివన్నీ కట్టుకథలు కావు. పిట్ట కథలు కావు. కల్యాణలక్ష్మి, రైతుబీమా రోజూ మీరు చూస్తనే ఉన్నరు. ధాన్యం అమ్మితే డబ్బులు ఎట్ల వస్తున్నయో మీకు తెలుసు. 24 గంటల కరెంటు ఎట్లొస్తున్నదో మీకు తెలుసు. ఏ విధమైన ప్రజాసంక్షేమం ఉన్నదో మీకు తెలుసు? ఇవాళ బీసీ బిడ్డలకు.. ఎవలైతే పూసవేర్లు, విశ్మకర్మలు, నాయీబ్రాహ్మణులు కావచ్చు.. రజకులు కావచ్చు వాళ్లకు రూ.లక్ష ఇచ్చి కొత్త పనిముట్లు కొనిస్తున్నాం. ఇవన్నీ మీ కండ్ల ముందు జరుగుతున్నయ్. ఎవరన్నా, ఎప్పుడన్నా చరిత్రల ఆలోచన చేసిం డ్రా? వీటి గురించి పట్టించుకున్నరా? నేల విడిచి సాము చేసినట్టుగా డైలాగులు చెప్పి, ఉపన్యాసాలిచ్చి, పిచ్చిలేపి పోయిండ్రు తప్ప ప్రజల బాధలు ఏంటని ఆలోచించిండ్రా?
నాడు రైతుల పరిస్థితి చూసి ఏడ్చిన
తెలంగాణ ఉద్యమ సమయంలో నా కం డ్లారా ఎన్నో మండలాల్లో రైతుల పరిస్థితి చూసి ఏడ్చిన. నిరంజన్రెడ్డి, నేను పాలమూరు జిల్లా నడిగడ్డకు పోతే, అక్కడ మనుషుల పరిస్థితి చూసి వలవల ఏడ్చినం. మా బతుకు ఎంది? ఎం జాతి మనది? ఇట్ల ఉంటే ఎవ్వరన్న ఊరుకుంటరా అని ఎడ్చి బాధపడ్డం. వాటన్నంటిని నేను చూసిన కాబట్టి నా గ్రామ సీమలు చల్లగా ఉండాలని, మా రైతుల ముఖాల్లో తెలివి రావాలని అనుకున్న. ఆనాడు చెట్టుకొకరు గుట్టకోకరం అయినం. ఇప్పుడు వలస పోయినోళ్లందరు వాపస్ వచ్చారు. నాకు ఇప్పుడు గర్వం గా, సంతోషంగా ఉన్నది. దర్జాగా కాలు మీద కాలు వేసుకొని పైకి వస్తున్నరు.. రావాలి. రా బోయే రోజుల్లో జాగ్రత్తగా వ్యవహరించండి. రైతు రుణమాఫీ, రైతుబంధు ఇంకా కొందరికి రావాల్సి ఉన్నది. ఏడు ఎకరాల వాళ్లకు రైతుబంధు రావాల్సి ఉన్నది. ఎంబీసీలకు ఇచ్చే రూ.లక్ష కూడా అందిరికీ వస్తనే ఉంటది. ప్రతి రజక, నాయీ బ్రాహ్మణ సొదరుడికి వస్తది. తొందరపడొద్దు, ఎవడో ఏదో చెప్తే నమ్మొద్దు. నేను మీకు హామీగా ఉంటున్నాను. అందరికీ వస్తాయి అని సీఎం కేసీఆర్ హామీ ఇచ్చారు.
పవర్ప్లాంట్తో మారనున్న నల్లగొండ ముఖచిత్రం
అన్ని విద్యుత్తు ఉత్పత్తి కేంద్రాలు గోదావరి ఒడ్డున ఉన్నయని, దక్షిణ తెలంగాణలో ఒక స్టేషన్ పెట్టాలని ఆలోచిస్తుంటే నా జిల్లాలో పెట్టాలని మంత్రి జగదీశ్రెడ్డి కొట్లాడిండు. ఇవాళ దామరచర్ల దగ్గర మా భాస్కర్రావు నియోజకవర్గంలో రూ.30 వేల కోట్లు ఖర్చుపెట్టి ప్రభుత్వ రంగంలో దేశంలోనే అతిపెద్ద అల్ట్రా మెగా పవర్ప్లాంట్ నిర్మిస్తున్నం. అది వస్తే ఉమ్మడి నల్లగొండ జిల్లా ముఖచిత్రమే మారిపోతది. అంత పెద్ద ప్రాజెక్టును నల్లగొండల బీఆర్ఎస్ ప్రభుత్వం కడుతున్నది. ఇంకా చాలా అద్భుతాలు జరగాల్సి ఉన్నది. విశ్వనగరంగా హైదరాబాద్ మారిపోయే పరిస్థితి కనబడుతున్నది. సంక్షేమం ఇదే విధంగా కొనసాగాలి.
ఆపద మొక్కులు నమ్మి మోసపోవద్దు
ఎన్నికలు వచ్చినయ్.. ఇప్పుడొచ్చి అందరూ ఆపద మొక్కుల మొక్కుతరు. ఒక మేరాయన బట్టలు కుడుతున్నట.. సూది కిందవడ్డది.. అప్పుడు లక్ష్మీనర్సింహాస్వామికి దేవుడాదేవుడా నా సూది కింద పడ్డది.. దొరికితే నీకు కిలో శెక్కెర పంచిపెడుత అని మొక్కిండు. భార్య లోపలికెళ్లి వచ్చి.. బాగనే ఉన్నది.. పది పైసల సూదికి పది రూపాయాల శెక్కెర పంచిపెడతారా ఎక్కడన్న అన్నది. ఏ.. సూది దొరకనీ తీయ్ ఎగవెడ్తం.. దేవుడేం జేత్తడు? అన్నడట. గట్లనే ఇప్పుడు వచ్చి మీకు ఆరు చందమామలు పెడతం.. ఏడు సూర్యులు పెడతం.. అని అరచేతిలో వైకుంఠం చూపుతరు. మోసపోతే గోస పడుతం. అందుకే అందరినీ దయచేసి కోరేది ఒక్కటే.. మీమీ గ్రామాల్లో విచక్షణతో చర్చ చేసి, బ్రహ్మాండంగా నిర్ణయం తీసుకోవాలె. సూర్యాపేటలో ఇంత పెద్ద సభ జరిగింది అంటే ఇక్కడ నలుగురు ఎమ్మెల్యేలు గెలిచినట్టే.. అనుమానం లేకుంట పోయింది. మరోసారి అద్భుతంగా బీఆర్ఎస్ పార్టీ గెలువబోతున్నది. అందులో ఎటువంటి డౌట్ లేదు. ఎవడు ఎన్ని కథలు చెప్పినా? ఏం మాట్లాడినా? పోయినసారికంటే ఇంకా ఐదారు ఎక్కువ సీట్లతోని బీఆర్ఎస్ గెలువబోతున్నది.
సూర్యాపేట సభలో తెలంగాణ అమరుడు శ్రీకాంతాచారి తల్లి శంకరమ్మతో మాట్లాడుతున్న ముఖ్యమంత్రి కేసీఆర్. చిత్రంలో ఎమ్మెల్యే గాదరి కిశోర్, ఎమ్మెల్సీ పల్లా రాజేశ్వర్రెడ్డి
సూర్యాపేటకు వరాలు
4 కోట్ల టన్నుల వడ్లు పండిస్తం
కరోనా వచ్చింది.. డబ్బులకు ఇబ్బంది అయింది.. మోదీ నోట్లను రద్దు చేస్తే రాష్ర్టానికి వచ్చే ఆదాయం పడిపోయింది. కానీ రెండుసార్లు కలిపి రూ.37 వేల కోట్లు రైతు రుణాలు మాఫీ చేసిన ప్రభుత్వం బీఆర్ఎస్ది. రైతుబంధు పెట్టినం.. ఎరువులు మంచిగా దొరుకుతున్నయ్.. విత్తనాలు దొరుకుతున్నయ్.. కల్తీ విత్తనాలు అమ్మితే జైళ్ల పారేస్తున్నం.. ఇప్పుడిప్పుడే తెలంగాణ పల్లెలు కళకళలాడుతున్నాయి.. రైతుల మొఖం తెల్లబడ్డది.. రైతులు ఇండ్లు కట్టుకుంటున్నరు.. అప్పుల బాధ నుంచి బయటపడుతున్నరు.. ఇంకో ఎడేనిమిడేండ్లు నడిస్తే నా తెలంగాణ రైతు భారతదేశానికే గర్వకారణంగా తయారైతడు.. నేను రైతుబంధు, కరెంటు, నీళ్లు ఇచ్చినా కష్టపడేది మాత్రం రైతులే. రైతులు కష్టపడుతున్నరు కాబట్టే తెలంగాణ రాష్ట్రం పంజాబ్ను తలదన్నేలా మూడు కోట్ల టన్నుల వడ్లు పండిస్తున్నది. ఖమ్మంలో సీతారామా ప్రాజెక్టు, మహబూబ్నగర్లో పాలమూరు ఎత్తిపోతల ప్రాజెక్టు పూర్తయితే నాలుగు కోట్ల టన్నుల వడ్లు పండుతయ్.
రావిచెరువు ఎట్ల నిండుతున్నది?
ఒక కాంగ్రెస్ నాయకుడు పాదయాత్ర జేసిండు. సూర్యాపేటకు కాళేశ్వరం నీళ్లు వస్తున్నయని నిరూపిస్తరా? అని ఆయన అంటడు. నిరూపించుడేంది నీ బొంద.. ఏడ చూసినా కనవడుతయ్. ఏ ఊరికి పోయినా కాలువ పొంట నీళ్లేనాయె. కొన్ని ఊరోళ్లు వచ్చి నాసేక్కువైతంది కాలువలు బంద్ చేయ్ అనే పరిస్థితి ఉన్నది. ఏడాది పొడుగుతా? ఎక్కడ పెన్పహాడ్ మండలం రావిచెరువు.. ఎక్కడ కాళేశ్వ రం.. ఎక్కడ శ్రీరాంసాగర్! 450 కిలోమీటర్లు ప్రయాణం చేసి ఇవాళ రావిచెరువు నిండుతున్నది. అంటే వట్టిగనే అనంగనే వస్తయా నీళ్లు. ఇదే కాంగ్రెస్ రాజ్యంలో.. ఇదే సూర్యాపేట పట్టణంలో ఎన్ని అలర్జీ బీమార్లు వస్తుండె మూసి మురికినీళ్లు తాక్కుంట? మూసీ మురికి నీళ్లే తాగించిన్రు దశాబ్దాల తరబడి. ఇవాళ మిషన్ భగీరథ ద్వారా బ్రహ్మాండంగా పాలధారల్లాంటి మంచినీళ్లు వస్తున్నయ్. సర్పంచ్లకు మనవి చేస్తున్న.. మీరు యాది జేసుకోవాలె.. ఎనకట మీ ఊర్లల్ల మోటర్లు కాలిపోతే.. బిల్లులు కట్టపోతే ఎన్ని అవస్థలు పడ్డరో మీకు తెలుసు. ఇవాళ రూపాయి బిల్లు లేకుంట, పంచాయతీల మీద భారం లేకుంట ప్రభుత్వం వాటర్ సప్లయ్ చేస్తున్నది. ఎన్ని కావాలంటే అన్ని నీళ్లు వస్తున్నయ్. ఈ సదుపాయాలన్నీ ఇంకా మెరుగుకావాలె. ఇంకా పెరగాలె. ఇంకా ముందుకుపోవాలె. ఇక్కడికే మనం సంతోషపడొద్దు. ఇవన్నీ జరగాలంటే ఉమ్మడి నల్లగొండ జిల్లాలో 12కు 12 సీట్లు బీఆర్ఎస్ గెలవాలె.