నిజామాబాద్, నవంబర్ 2 (నమస్తే తెలంగాణ ప్రతినిధి): గులాబీ జెండాల హోరు.. జై తెలంగాణ, జై కేసీఆర్ నినాదాల జోరు.. ఊరూరూ దండుగట్టి రోడ్లన్నీ ప్రవాహమై.. సీఎం కేసీఆర్ ప్రజాఆశీర్వాద సభలు జన సంద్రమయ్యాయి. నిజామాబాద్ జిల్లా బాల్కొండ నియోజకవర్గం పరిధిలోని వేల్పూర్, జిల్లా కేంద్రమైన నిర్మల్లో, జగిత్యాల జిల్లా ధర్మపురిలో గురువారం నిర్వహించిన సభలు విజయవంతం అయ్యాయి. ఆయా సభల్లో సీఎం కేసీఆర్ ప్రసంగాలతో ప్రజలు, బీఆర్ఎస్ శ్రేణుల్లో సరికొత్త ఉత్తేజం నిండుకున్నది. గులాబీ జెండాల రెపరెపలతో ఊరూరా ఏకమై వేలాది మంది సభలకు తరలివచ్చారు. బీఆర్ఎస్ పథకాలు, కారు గుర్తు, ఎన్నికల మ్యానిఫెస్టో వివరాలతో కూడిన ప్లకార్డులు ప్రదర్శిస్తూ కార్యకర్తలు సందడి చేశారు. సీఎం కేసీఆర్ ప్రసంగాలకు జనం ఈలలు, కేరింతలు, చప్పట్లతో సభలు దద్దరిల్లాయి.
గులాబీల జెండలమ్మ రామక.. పాటను గాయని మధుప్రియ పాడుతుంటే కండువాలు, కర్చీప్లు గాలిలో ఊపుతూ ఆయా సభా ప్రాంగణాల్లోని జనమంతా ఉత్సాహంగా నృత్యాలు చేశారు. రైతుబంధు ఉండాలా.. వద్దా, 24 గంటల కరెంటు ఉండాలా, వద్దా, ధరణి ఉండాలా, వద్దా.. అన్న సీఎం కేసీఆర్ ప్రశ్నలకు.. ఉండాలి.. అంటూ ముక్తకంఠంతో చేతులెత్తి నినదించడంతో ఆ ప్రాంగణాలన్నీ హోరెత్తిపోయాయి. బాల్కొండ, నిర్మల్, ధర్మపురిలో మంత్రులు, బీఆర్ఎస్ అభ్యర్థులు వేముల ప్రశాంత్రెడ్డి, అల్లోల ఇంద్రకరణ్రెడ్డి, కొప్పుల ఈశ్వర్ ఆధ్వర్యంలో ఈ ప్రజాఆశీర్వాద సభలు జరిగాయి. ఆయా సభల్లో నమస్తే తెలంగాణ సీఎండీ, రాజ్యసభ సభ్యుడు దామోదార్రావు, ఎంపీ సురేశ్రెడ్డి, ఎమ్మెల్యేలు జీవన్రెడ్డి, బాజిరెడ్డి గోవర్ధన్, బిగాల గణేష్ గుప్తా, మహ్మద్ షకీల్, జడ్పీ చైర్మన్ దాదన్నగారి విఠల్రావు, బోథ్, ఖానాపూర్ బీఆర్ఎస్ పార్టీ అభ్యర్థులు అనిల్ జాదవ్, భూక్యా జాన్సన్నాయక్ తదితరులు పాల్గొన్నారు.