హైదరాబాద్, జూలై 21 (నమస్తే తెలంగాణ): వైద్యారోగ్యశాఖలో జరుగుతున్న బదిలీల రచ్చపై ముఖ్యమంత్రి రేవంత్రెడ్డి ఆరా తీసినట్టు సమాచారం. మిగతా అన్ని శాఖల్లో సజావుగా బదిలీలు జరుగుతుండగా, ఒక్క వైద్యారోగ్య శాఖలోనే ఎందుకు ఆందోళనలు జరుగుతున్నాయని ఉన్నతాధికారులను అడిగినట్టు తెలిసింది. రోడ్లపైకి వచ్చి నిరసనలు తెలపడం, రోజులపాటు బదిలీలు నిలిచిపోవడంపై అసంతృప్తి వ్యక్తం చేసినట్టు విశ్వసనీయ వర్గాల ద్వారా తెలిసింది. అసలు ఏం జరుగుతున్నదో సమగ్ర వివరాలు సేకరించి, నివేదిక అందించాలని సీఎం ఆదేశించినట్టు తెలిసింది. వైద్యారోగ్య శాఖలోని ఇతర విభాగాల్లో బదిలీలు సాఫీగా సాగుతున్నాయని, డీపీహెచ్ పరిధిలో మాత్రమే రచ్చ జరుగుతున్నదని అధికారులు సీఎంకు తెలిపినట్టు సమాచారం.
సీనియార్టీ జాబితాను ఇప్పటివరకు నాలుగుసార్లు రివైజ్డ్ చేశారని, అయినా తప్పులు ఉన్నాయంటూ అనేక ఉదాహరణలు తమ దృష్టికి వచ్చాయని చెప్పినట్టు తెలిసింది. అధికారుల చేతివాటం, సంఘాల నేతల అడ్డగోలు ప్రమేయం వల్లే ఈ పరిస్థితి తలెత్తిందని సీఎంకు వివరించినట్టు సచివాలయ వర్గాలు తెలిపాయి. ఒక్క నర్సులే కాకుండా ల్యాబ్ అసిస్టెంట్ మొదలు డిప్యూటీ డైరెక్టర్ వరకు ఇదే తంతు కొనసాగిందని చెప్పినట్టు సమాచారం. దశాబ్దాలుగా హైదరాబాద్లో పాతుకుపోయిన వారిని బదిలీ చేయకుండా, అక్కడే రిటెయిన్ చేయడంపై దుమారం రేగిందని చెప్పారట. దీంతో తాను ఢిల్లీ నుంచి వచ్చేలోగా నివేదిక సిద్ధంగా ఉండాలని అధికారులను సీఎం ఆదేశించినట్టు సచివాలయ వర్గాలు తెలిపాయి.