హైదరాబాద్, జూలై 18(నమస్తే తెలంగాణ): హైదరాబాద్లోని భారత జాతీయ రహదారుల ప్రాధికార సంస్థ(ఎన్హెచ్ఏఐ)ప్రాంతీయ అధికారిని మార్చాలని రాష్ట్ర రోడ్లు భవనాల శాఖ మంత్రి కోమటిరెడ్డి వెంకట్రెడ్డి ఆ సంస్థ చైర్మన్కు ఫిర్యాదు చేసినట్టు తెలిసింది.
రాష్ట్ర రహదారుల శాఖతో ఎన్హెచ్ఏఐ సమన్వయంతో పనిచేయడం లేదని, దీంతో రాష్ట్రంలో చేపట్టిన ప్రాజెక్టుల్లో తీవ్ర జాప్యం జరుగుతుందని ఇటీవల మంత్రి ఢిల్లీ పర్యటన సందర్భంగా చైర్మన్కు చెప్పినట్టు సమాచారం. రాష్ట్ర ప్రభుత్వం ఏదైనా సమాచారం కోరితే స్పందించడం లేదని ఆరోపించినట్టు తెలిసింది. దీనిపై చైర్మన్ స్పందించి ఆర్వోను మార్చుతామని హామీ ఇచ్చినట్టు విశ్వసనీయ వర్గాల సమాచారం.